Estudante sira no reprezentante liña ministeriál sira ne´ebé simu sertifikadu husi MNEK. Imajen: Nelia Fernandes

DILI, 20 dezembru 2019 (TATOLI)-Ministériu Negosiu Estranjeiru no Kooperasaun (MNEK) entrega sertifikadu ba estudante universitáriu husi estabelesimentu ensinu superiór oioin tanba apoiu ona servisu protokolu nian iha komemorasaun loron Konsulta Populár, 30 agostu no prezensa forsa manutensaun ba pás (INTERFET, sigla inglés) iha Timór.

“Ohin, ami halibur fali estudante sira ne’ebé naton ami rekruta husi universidade hirak iha Dili laran ne’e, nune’e mós liña ministeriál sira ne’ebé fó sira-nia serbisu, apoiu ba iha protokolu ne’ebé konsege ajuda hodi halo susesu ita-nia selebrasaun komemorasaun 30 de agostu, 20 anos aniversáriu INTERFET nia iha Timór,” Diretór Jerál Asuntu Konsulár Protokolár, Serimoniál no Mídia, Juvêncio Martins ba Ajénsia TATOLI, iha edifísiu MNEK, Praia dos Coqueiros, Dili, ohin.

Ezekutivu ne´e haktuir, estudante sira ne´e hotu halo serbisu di´ak nune´e komisaun organizadora ne´ebé lidera diretamente husi lider timoroan, Kay Rala Xanana Gusmão, hodi fó rekoñesimentu ba estudante sira ne´e.

“Rekuñesimentu ne’e hanesan estimu ida ne’ebé ita fó ba ita-nia alin sira tanba sira ne’e mak futuru, tempu sira barak mai, husi internasionál barak mai, labarik sira ne’ebé aban bainrua hakarak serbisu karik iha ne’e, entaun sira hanesan familiarizmu ona ho serbisu sira iha ne’e no mós bele ba fatin seluk, sira hatene ona mais ou menus serbisu protokolu la’o oinsá”.

Alende ne’e, tuir Diretór Juvêncio Martins katak entrega sertifikadu ne´e nu´udar mós aktu apresiasaun no rekoñesimentu ida nune´e mós hametin nafatin relasaun entre MNEK ho instituisaun edukasionál sira no mós liña ministeriál sira seluk para iha serbisu sira iha tempu oin mai bele hala´o ho di´ak no koopera di´ak nafatin.

Nia esplika, sertifikadu ne´e entrega simbolikamente de´it ba koordenadór estudante sira husi universidade depois restu sei fó ba idaidak, sei ba foti iha diretora protokolu nia fatin, para rai hanesan rekordasaun ba sira-nia karreira aban bain rua. “Ba sira hothotu ne’ebé mak naton partisipa serbisu protokolu iha 30 de agostu liubá ne’e, ita-nia Prezidente Komisaun Organizadora Maun Bo’ot Xanana Gusmão, hakarak hanesan fó agradesimentu ba sira”.

Karik tempu tuir mai sei buka fali estudante seluk ka mantein nafatin, Diretór Jerál Protokolár no Média, Juvêncio Martins hateten: “ Klaru, ita sei husu nafatin sira, para mai fó apoia”.

Entretantu, estudante sira ne’ebé mak fó apoiu ba serbisu protokolu iha komemorasaun Konsulta Populár no prezensa INTERFET ba dala rua nolu mak UNTL (Universidade Nacional Timor Lorosa´e), UNITAL (Universidade Oriental Timor Lorosa´e), UNPAZ (Universidade da Paz) no DIT (Dili Institute of Technology), inklui mós reprezentante husi liña ministeriál sira ne´ebé mós hola parte iha komisaun.

Notísia relevante:Estudante 116 Tuir Formasaun Protokolu ba Festa Referendu

Jornalista : Nelia Fernandes

Editor      : Rafy Belo

HAKEREK NO HATÁN

Please enter your comment!
Please enter your name here