Sesaun plenária Parlamentu Nasionál. Imajen/Tatoli

DILI, 20 dezembru 2019 (TATOLI) – Hafoin Governu submete Proposta Lei Orsamentu Jerál Estadu (OJE) 2020 foun, membru Parlamentu Nasionál (PN) sira apoia debate ho karater urjénsia tanba konsidera presiza duni orsamentu hodi finansia mákina Estadu.

“Governu husu pedidu urjénsia, hanesan regra ne’ebé tau ona iha ami-nia rejimentu, signifika tempu ne’e la’o daudaun la presiza halo audiénsia naruk hanesan uluk tanba orsamentu nafatin númeru mak hatún. Ha’u hanoin komisaun sira la presiza halo audiénsia ba tempu naruk”, tenik Xefe Bankada Parlamentár CNRT, Duarte Nunes, iha resintu Parlamentu, sesta ne’e.

Deputadu ne’e konsidera, pedidu urjénsia ne’e nesesáriu tanba kuaze tama tinan fiskál foun.

“Agora orsamentu hatún ona ne’e hotu-hotu nia ezijénsia, lori fali mai ona konserteza ita apoia tanba povu presiza. Karik buat ruma kontra lei ruma presiza haree hamutuk”, nia akresenta.

Deputadu Bankada PLP, Francisco de Vasconcelos, apoia pedidu Governu ba debate orsamentu ho karatér urjénsia.

“Sé lalais liu di’ak liután, maibé mai plenária mak sei deskute, marese ho karater urjénsia duni ka lae tanba kestaun tempu. Agora Governu hatún ona ba biliaun $1,668 ne’e razoável”, Deputadu ne’e realsa.

Nia subliña, redusaun orsamentu ne’e fó impaktu ba programa no klaru katak programa mós sei redús maibé situasaun reál mak tenke tuir kbiit finansiamentu.

“Pozisaun PLP nian katak Estadu ne’e tenke moris ho osan, laiha Estadu ida mak moris sein orsamentu. Tanba ne’e propoin atu rekupera fali situasaun sira uluk no labele kria inserteza”, nia tenik.

Nune’e mós, Deputada Bankada KHUNTO, Olinda Guterres, konsidera pedidu Governu nesesáriu.

“Ami apoiu pedidu Governu hodi debate proposta lei orsamentál 2020 ho karater urjénsia tanba ita labele moris beibeik ho osan duadésimu, importante osan biliaun $1,6”, dehan Deputada Olinda.

Iha parte seluk, Deputada Bankada Opozisaun Partidu Demokrátiku (PD), Elvina Sousa Carvalho, apoia pedidu Governu.

“Ha’u hanoin ne’e nesesáriu atu deskute ho urjénsia tanba ita labele moris ho osan duadésimu ba tempu naruk, maibé buat hotu sei liuhosi plenária mak ami deskuti”, dehan Deputada Elvina.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here