Primeiru Kongresu Nasionál Kombatente Libertasaun Nasionál, iha Centro Convencões Díli (CCD), 20 dezembru 2019. Imajen Tatoli

DILI, 20 dezembru 2019 (TATOLI)–Prezidente Repúblika (PR), Francisco Guterres Lú Olo, kontinua enkoraja Kombatentes Libertasaun Nasionál atu oinsá buka dalan hodi hamenus dependénsia ba Orsamentu Jerál Estadu (OJE). 

“Iha dalan seluk atu hamenus dependénsia Kombatente Libertasaun Nasionál nian husi Orsamentu Jerál Estadu”, Xefe Estadu ko’alia asuntu ne’e, liuhusi diskursu iha Primeiru Kongresu Nasionál Kombatente Libertasaun Nasionál, iha Centro Convencões Díli (CCD), ohin.

Xefe Estadu konsidera Governu ne’ebé dirije husi Kombatente, Jenerál Taur Matan Ruak, hatama hanoin harii Fundu Veteranu iha programa Governu nian, no Governu rasik mak sei asume nu’udár nia polítika ba Kombatente Libertasaun Nasionál.

Aman nasaun ne’e husu atu hotu-hotu, liuliu sira ne’ebé ho kbiit-laek, bele fó hanoin ba malu atu haree oinsá fundu ne’e la’o ba oin.

“Diresaun ne’ebé mak kongresista sira sei hili iha kongresu ida-ne’e, bele husu tulun husi espesialista sira atu define polítika ba fundu ne’e, oinsá ita kontribui no hetan benefisiu, sé mak sei jere no sé-sé mak sei hetan benefísiu”, nia subliña.

PR Lu Olo fó hanoin katak konsellu ne’e sei simu mós knaar ne’ebé hala’o husi Komisaun Omenájen, supervizaun rejistu no rekursu to’o ohin loron, dirije husi Virgílio Smith.

Tanba ne’e, nia hatutan, ho estrutura no rekursu umanu, tékniku no finanseiru natoon, iha munisípiu ida-idak no iha Rejiaun Administrativa Espesiál Oé-Cusse Ambeno (RAEOA), Prezidente fiar katak prosesu validasaun ba Kombatente Libertasaun Nasionál sei la’o tuir regra ne’ebé hatuur rekoñesimentu ba ida-idak tuir méritu ida-idak nian.

“Ha’u fiar mós katak Konsellu Kombatente Libertasaun Nasional sei buka dalan oinsá de’it atu Kombatente ida-idak hatene oinsá hatutan ninia misaun, iha ita-nia Timor-Leste livre no independente”, nia haklaken.

Nia mós sita Sekretáriu Estadu no Ministru en-ezersísiu asuntu Veteranu, Gil “Oan Soro”, Kombatente Libertasaun Nasionál ida, iha mehi boot oinsá ajuda Kombatente Libertasaun Nasionál haree ba futuru no oinsá garante oan no beioan sira hetan moris-di’ak, edukasaun no tratamentu saúde iha abanbairua ho osan rasik.

“Kombatente husi Munisípiu Ainaro halibur daudaun ona sira-nia osan rasik ho hanoin atu tau iha fundu ida atu fó benefísiu ba sira no ba sira-nia oan no bei-oan sira. Ne’e ezemplu di’ak ida-ne’ebé presiza hatutan iha Timor-Leste tomak. Maibé, Kombatente Libertasaun Nasional sira hamutuk mak deside no asume”, nia fó ezemplu.

Tanba ne’e, atu Konsellu ne’e la’o ba oin, Xefe Estadu dehan, presiza kombatente iha órgaun diretivu, ho kapasidade organizasaun, diresaun, kriativu, hatene rona no fó orientasaun ho laran-hakmatek no moos, ne’ebé hatene hasees-an husi opsaun partidária, korrupsaun, koluzaun no nepotizmu.

“Membru sira bele kontinua nu’udar militante iha ida-idak nia partidu, maibé labele lori interese partidária mai iha konsellu ne’e”, PR Lú Olo fó atensaun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here