Ohin Jornalista Sira Simu Atribuisaun Karteira Profisionál ba Jornalista. Imajen/Tatoli Egas Cristovão

Karteira profisionál ne’e sei vale liu kuandu produtu jornalístíku konsege muda ema seluk ninia pensamentu no desizaun polítiku sira nian ba interese ema barak nian.

DILI, 20 dezembru 2019 (TATOLI)-Jornalista na´in 11 inklui estajiáriu na´in haat ne´ebé konklui ona sira-nia estajiu ba jornalista tuir lei komunikasaun sosiál, simu ona Karteira Profisionál husi Konsellu Imprensa (KI).

Jornalista Rita Almeida (Loos) no Prezidente Konsellu Imprensa, Virgílio da Silva Guterres (Karuk), hodi Hetan Atribuisaun Karteira Profisionál ba Jornalista. Imajen/Tatoli Egas Cristovão

Reprezentante jornalista sira ne´ebé simu Karteira Profesionál, Jornalista Rita Almeida hateten, karteira profisional ne’e sei vale liu kuandu produtu jornalístiku konsege muda ema seluk ninia pensamentu no desizaun polítiku sira nian ba interrese ema barak nian.

Karteira Profesionál signifika hanesan karta kondusaun ho sentidu aprovadu ona husi ezame kona-ba regra sira hotu sinál tranzitu nian no mós kuandu kabe ba atividade jornalístika nian mak tenke hatene didiak saida mak lei sira ne’ebé vigor iha nasaun Repúblika ida ne’e.

“Hatene didi´ak saida mak kódiku konduta no regra sira seluk ne’ebé entidade públika no privada sira estabelese liuliu ba interrese públiku. Tanba ne’e Karteira Profesionál ne’e sei vale liu kuandu ita-nia produtu jornalístiku konsege muda ema seluk ninia pensamentu no desizaun polítiku sira nian ba interese ema barak nian,” dehan Jornalista Rita Almeida, iha nia diskursu, iha Salaun Delta Nova, Dili, ohin.

Rita esplika, atu haforsa sentidu Karteira Profisionál nian hodi hametin profesionalizmu jornalista sira nian, la’ós ho surat-tahan ne’e de’it maibé oinsá atu hamosu ejizénsia ida hodi dignifika atu profisaun jornalista ne’e bele iha kredibilidadeatu nune’e bele kontribui ba informasaun sira ho kualidade ba públiku, liuliu ba instituisaun media sira ne’ebé mak jornalista sira hakna’ar aan ba.

Maibé kna’ar mós husu ba públiku no KI atu kontinua akompaña lala´ok jornalista sira ne’ebé mak simu ona Karteira Profesionál atu bele la´o nafatin tuir regra sira tanba tempu ona atu toma atensaun ba jornalista sira ne’ebé ho intensaun viola kódigu konduta ba interrese privadu ka partidaria.

“Tanba husi profisaun ne’ebé ita hili garante iha ita-nia konstituisaun artigu 50º. Husi profisaun ne’e ita-nia atividade sira asegura mós iha lei inan artigu 41º ne’ebé ko´alia kona ba liberdade imprensa no komunikasaun sosiál. Husi konstituisaun ne’e hahoris mos lei númeru 5/2014 kona ba lei komunikasaun sosiál iha artigu 2º ne’ebé ko´alia mós definisaun no artigu 3º sita mós kna’ar komunikasaun sosiál nian”.

Diretóra TATOLI ne’e realsa liután katak iha artigu importante seluk mak hatuur iha artigu 8º ne’ebé haktuir kona-ba saida mak liberdade imprensa. Liuhusi momentu istóriku ida ne’e atu haforsa atividade sira ne’ebé define ona iha lei númeru 5/2014 liuhusi artigu 2º, artigu 3º no artigu 4º kona-ba komunikasaun sosiál nian.

Ne’eduni, ne’e atu hametin baze no krediblidade servisu jornalista sira nian ba Karteira Profisionál, só media forte no kualidade de’it mak bele salva povu no nasaun ida ne’e. Portantu, lei ka estatutu la mensiona kona ba grau sira ne’e maibé liuhusi oportunidade di´ak ne’e hakarak sujere ba Konsellu Imprensa atu kontinua konsidera servisu jornalista sira nian iha profisaun ida ne’e.

Iha fatin hanesan, Prezidente KI, Virgílio Guterres no Reprezentante Sekretáriu Estadu Komunikasaun Sosiál (SEKOMS), Diretór Luis Evaristo Soares apresia mensajen Jornalista Rita Almeida nian.

“Ha’u lori KI nia naran hato’o parabéns ba jornalista na’in 11 no estajiariu na’in haat ne’ebé simu ona Karteira Profisionál ida ne’e”.

“Nu’udar Prezidente KI hakarak hateten iha buat tolu mak KI husu ba media na´in sira atu hasa´e kualidade jornalista sira nian mak kapasidade tekníka, kapasidade profisionál no kapasidade intelektuál,” autoridade másima KI ne´e husu.

Notísia relevante:Jornalista 216 Sei Hetan Karteira profisionál

Jornalista        : Tomé Amado

Editór              : Rafy Belo

 

HAKEREK NO HATÁN

Please enter your comment!
Please enter your name here