Ekipa IPG koko hela gás ou ahi ne'ebé mak sai hosi fatuk leten ne'ebé lokaliza iha Iralere, suku Matahoi, Postu Administrativu Watulari, Munisípiu Viqueque, Sexta (20/12/2019). Imajen TATOLI/Antónia Gusmão.

WATULARI, 20 dezembru 2019 (TATOLI)- Institutu Petróleu no Jeolojia (IPG, sigla portugés) foti ona amostra gás ne’ebé lokaliza iha Atalele, suku Matahoi, Postu Administrativu Watulari, Munisípiu Viqueque.

Objetivu foti amostra ne’e atu lori bá halo análize iha laboratóriu hodi hatene loloos katak fatin ne’e mosu duni gás ka lae.

“Ami mai haree makro gás ship hodi foti sampel iha área Atalele, sampel ne’e ami foti para halo komparasaun ho sampel Aliambata katak sira ne’e mai hosi ida de’it ka lae? Hanesan ou lae? No iha fatin ne’e ami mós iha ekipamentu AGI iha área ne’e, kuaze module tolu. No sampel ne’e ami foti halo mós komparasaun ba module sira ne’ebé ami instala hodi hatene katak gás ida ne’e mak hosi ne’ebé? No iha okos gás iha ou lae?”, Diretór Investigasaun Jeolójiku no Minerál, Elias da Silva Cabral, ba jornalista sira iha Irabere, suku Matahoi, Viqueque, ohin.

Elias afirma amostra ne’ebé maka tékniku IPG nian foti ona hodi bá halo análiza atu hatene kompozisaun kimikál hodi halo komparasaun amostra hosi gás sira ne’ebé foti ona hodi nune’e bele haree fali katak responde ho module sira ne’ebé monta iha área refere ka lae.

“Gás (ahi sai hosi fatuk leten) ne’e mosu kleur ona, ne’ebé ita ko’alia kona-ba idade ne’e ita ko’alia kona-ba era Jeolojia nian ne’ebé iha fratura ne’ebé ami observa hatudu katak fratura ne’e idade kuartenál”, katak.

IPG identifika no foti ona amostra hosi gás iha territóriu Timor-Leste hamutuk 17 ne’ebé lokaliza iha Quelicai, Manatuto, Covalima, no Suai. Hosi fatin sira ne’e balu ativu no balu tanba kondisaun terrenu dalaruma rai taka, entaun fatin sira ne’e la ativu ona.

Diretór ne’e esplika: “Fatin ne’ebé ita haree ne’e ahi sai hosi fatuk leten ne’e atu dehan katak ahi sai tanba gás ne’e mak ami bolu dehan gás ship, gás ne’ebé sai hosi fatuk. Gás ship ne’e ninia benefísiu maka halo estudu sientífiku no sai fatin peskiza ba estudante sira.

Maibé haree ba valór ekonómiku hosi gás ship ne’e, diretór ne’e dehan, presiza análiza buat barak, katak luan hosi gás ne’e hira no ninia rezerva.

Ekipa IPG akompaña hosi komunidade sira hodi bá haree direta gás no foti amostra.

Entretantu, IPG foti ona amostra hosi gás iha territóriu Timór hamutuk 17 no lima maka halo ona análiza iha laboratóriu.

Notísia relevante : IPG Presiza Laboratóriu no Edifísiu Permanente Hodi Halo Análize ba Amostra Sira

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here