Graduasaun IPDC ba da-hitu. Imajen: Nelia Fernandes

DILI, 20 dezembru 2019 (TATOLI)-Ensinu superiór privadu, IPDC (Instituto Professional de Canossa), iha ámbitu graduasaun ba da-hitu, gradua tan estudante finalista na´in 42 husi Departamentu Técnicas de Computação e Informática no Gestão Administrativa.

“Hau dezeja katak imi tane aas valór hotu ne’ebé imi aprende ona iha IPDC, formasaun fuan mak sabedoria Canossa nian, forma joven sira-nia karakter hatene moris simples, haraik aan, hatene hadomi, responsável, badinas, respeitu no hamta´uk Maromak, inan-aman  no Nai ulun sira,” hateten Magnifika Reitora IPDC, Ervinia Martins Brito, liuhusi diskursu iha Graduasaun Dahitu ho tema “Papel Ensinu Superiór Timor-Leste Iha Era Revolusaun Indústria 4.0” iha Salaun Canossa, Manleuana, Dili, ohin.

“Hamutuk ho graduadu 42 ho sira-nia inan aman no família sira hotu, ita fó grasa ba Maromak halo di’ak ba oin, ne’ebé sira simu husi Nai nia laran luak, tanba Maromak hadomi imi idaidak,” Reitora Ervinia Martins Brito dehan.

Graduasaun ba graduadu ho númeru ki´ik, Akadémika ne´e akresenta: “Ami baibain ami-nia slogan mak ne’e Small But Beautiful (Ki´ik maibé furak), kompara ho tinan seluk, tinan ne’e graduadu uituan de’it no susar ho klosok gradua sira fó fiar ba imi katak depois tinan ha’at no tinan ha’at ho balun imi mai aprende iha IPDC, imi iha ona esperiénsia ruma, ne’ebé halo imi fiar aan hodi ba hasoru mundu reál ne’ebé dezafia tebes”.

Iha biban hanesan, reitora IPDC ne´e informa katak haree ba rekursu IPDC iha doutor ida, ho doutora rua, maestradu 14 no lisensiatura na’in hitu.

“Instituisaun iha boa vontade atu hasa’e nafatin kualidade rekursu uumanu sira. Husi sorin seluk, ami rekoñese katak ami fraku tebes iha parte jestaun finanseira ni’an, ne’ebé sai hela obstakúlu boot ida ba dezenvolvimentu instituisaun ne’e rasik,” nia rekoñese.

Maske nune´e, Magnifika Reitóra Ervinia Martins Brito agradese ba governu Repúblika Demokrátika Timor-Leste (RDTL) inkluizamente Ministériu Ensinu Superiór Siénsia no Kultura (MESSK) tanba apoiu nafatin IPDC hodi apoiu dosente sira ba kontinua sira-nia estudu iha níve mestradu no doutoramentu.

“Grasa Deus, tinan ne’e ami-nia profesora ida ramata tan iha doutoramentu, nune’e mós ba apoiu fasilidade sira ba biblioteka no laboratoriu nian”.

“Ha´u hato´o agradesimentu ba MESSK, Longuihos dos Santos ne’ebé fó atensaun ba ami-nia pedidu, nune’e tinan ne’e IPDC hetan orsamentu ho montante deza nove mil e duzentos e cinquenta,ho finalidade ne’ebé foin temi iha leten”.

Ba graduadu 42, Magnifika Reitora IPDC, Ervinia Martins Brito sujere katak hanesan alumni IPDC lasu amizade ho IPDC kontinua ba nafatin. Enkuantu ba inan-aman graduadu sira, akadémika IPDC ne´e hateten: “Obrigada ba imi-nia konfiansa no apoiu durante tinan haat no balun, oras ne’e ami entegra fila fali sira (estudante graduadu) ba imi-nia liman, ba sosiedade no kreda Timor-Leste”.

Entertantu, partisipante serimónia graduasaun IPDC ne´e mak Ministru Longuinhos dos Santos, Prezidente ANAAA (Ajénsia Nasionál ba Avalisaun no Akreditasaun Akadémika, sigla portugés), Samuel Freitas, Diretor Ezekutivu ANAAA, Edmundo Viegas,  Madres Canosiana, Dosente IPDC no inan-aman graduadu sira.

Notísia relevante:Estudante Pilár Importante No Razaun Forte Harii Universidade

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here