Xapa Matríkula Orijinál. Imajen/Natalino Costa.

DILI, 20 dezembru 2019 (TATOLI) – Xefe Departamentu Rejistu Veíkulu Diresaun Nasionál Transporte Terrestre (DNTT) Ministériu Transporte no Komunikasaun (MTK), Nelson Xavier Martins, informa DNTT hahú distribui ona xapa matrikula ba motorista no kondutór sira.

“Komesa horiseik no ohin ami distribui ona xapa matríkula orijinál ba ita-nia motorista sira”, Nelson dehan ba Ajénsia TATOLI iha Balide, ohin.

Nia salienta kompañia ne’ebé maka prodús xapa matríkula, hatama ona ba DNTT ho totál hamutuk 22.861.

“Kompañia prodús hotu ona xapa matrikula, no sira hatama mai tuir duni kontratu ne’ebé maka iha hamutuk 22.861″, Nelson katak.

Tuir Nelson Xavier, prosesu distribuisaun xapa orijinál ne’e halo tanba iha ona termu entrega husi parte lojístika ministériu nian ba DNTT, nune’e hahú distribui tuir kategoria ba motór no karreta.

“Kategoria ba motorizada L to’o M no ba karreta A18 to’o 20”, informa.

Hodi hatutan kategoria ne’e maka kompañia prodús tuir termu kontratu ho ministériu no kona-ba kategoria sira ne’ebé seidauk, husi parte DNTT espera ho orsamentu tinan oin Governu bele rezolve.

“Tanba tuir plat surat-tahan ne’e ami to’o ona O, entaun espera Governu bele rezolve kestaun ne’e”, katak.

Ho distribuisaun xapa matrikula ne’e, DNTT hahú responde netik preokupasaun kliente sira durante ne’e.

Responsavel Lojístika DNTT, Luis Alfonso. Imajen/Natalino Costa.

Iha fatin hanesan, Responsavel Lojístika DNTT, Luis Alfonso, salienta parte DNTT simu ona xapa matríkula ba motorizada rihun 18-resin kompostu xapa matríkula kategoria L iha rihun 8 no kategoria M hamutuk rihun 10-resin. Enkuantu ba karreta kategoria A18 to’o 19, rihun rua no ba kategoria xapa matrikula A20 mós 2000.

Nia informa durante loron rua, horiseik no ohin, kliente kuaze 200-resin maka foti ona xapa matríkula.

Kompañia ne’ebé prodús xapa matríkula ne’e maka Caicobilari Supplies Unipessoal, Lda.

Notísia relevante : Empreza Caicobilari: Falta Xapa Matríkula 6.159

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here