Foto google

DILI, 20 dezembbru 2019 (TATOLI)–Asembleia Jerál Nasaun Unida adota ona rezolusaun kona-ba Estatutu Observadór ba g7+ iha Nasaun Unida, iha 18 dezembru 2019, iha Nova Iorke. 

Komunikadu ne’ebé fó sai husi Sekretariadu g7+ iha Dili, ohin, hateten katak ne’e pasu istóriku ida iha g7+ nia perkursu durante tinan 10 g7+ deside atu aplika ba estatutu observadór iha enkontru ministeriál ba dala 5 iha juñu 2019 iha Lisboa.

Hafoin enkontru ne’e, Misaun Permanente Sierra Leone iha Nasaun Unida reprezenta membru g7+ hato’o pedidu ba Sekretáriu Jerál Nasaun Unida hodi husu konsiderasaun atu inklui iha ajenda sesaun 74 ba Asembleia Jerál.

Sekretariadu g7+ serbisu hamutuk ho Misaun Permanente Sierra Leone, Timor-Leste no membru seluk iha Nova Iorke durante outubru 2019 atu mobiliza suporta ba rezolusaun ne’e.

Desizaun Asembleia Jerál 49/426 iha 9 dezembru 1994, kona-ba oferese estatutu observadór iha Asembleia Jerál ba Estadu no ba organizasaun inter-governamentál ne’ebé maka ho atividade kabe ba iha interese Asembleia nian.

Ne’e duni, hetan estatutu observadór ne’e, manifesta katak g7+ nu’udár organizasaun inter-governamentál ne’ebé importante tebes.

Membru Nasaun Unida durante konsulta iha fulan setembru no outubru 2019, hatudu ona indikasaun pozitivu atu fó suporta.

Ho estatutu observadór iha Nasaun Unida, g7+ iha meiu hodi bele hato’o perspetiva koletiva iha ajenda no serbisu Nasaun Unida nian, liuliu kona-ba harii no sustenta pás no seguransa, hadi’a serbisu forsa manutesaun pás nian no implementasasun ajenda 2030.

Grupu g7+ sei hetan benefísiu liuhusi serbisu hamutuk ho Nasaun Unida no ninia ajénsia sira iha esforsu atu bele atinje pás no estabilidade ba longu prazu.

Sekretariadu g7+ hato’o agradeseimentu boot ba lideransa husi nasaun Sierra Leone ne’ebé lidera g7+, Timor-Leste nu’udár uma-na’in ba g7+, no membru nasaun g7+ ba sira-nia suporta, no nasaun ne’ebé la’ós membru g7+ ba sira-nia kolaborasaun no suporta ba rezolusaun g7+ nian hodi sai observadór iha ONU.

g7+ estabelese formalmente iha 2010, nu’udár organizasaun inter-governamentál husi nasaun 20 ne’ebé afeta husi konflitu no frajilidade, liuhusi fahe lisaun kona-ba harii pás no harii Estadu no halo advokasia atu promove asaun maka lidera pás no estabilidade.

Membru nasaun g7+ maka Afghanistaun, Burundi, Repúblika Sentál Áfrika, Chad, Comoros, Cote d’Ivoire, Repúblika Demokrátika Congo, Guinea, Guinea-Bissau, Haiti, Libéria, Papua Nova Guinea, Sierra Leone, Somália, São Tomé e Principé, Ilha Solomon, Sudan Súl, Timor-Leste, Togo no Yemen.

Sierra Leone maka nasaun ne’ebé lidera g7+ no Sekretariadu Permanente iha Dili, Timor-Leste, ho European Hub iha Lisboa, Portugál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here