Ministru Transporte no Komunikasaun, José Agostinho da Silva. Imajen TATOLI/Egas Cristovão

DILI, 19 dezembru 2019 (TATOLI) – Ministru Transporte no Komunikasaun, José Agostinho da Silva, informa Governu Timor-Leste liuhusi Ministériu Transporte no Komunikasaun (MTK) sei asina nota entendimentu (MoU, sigla inglés) ho Ministru Transporte Indonézia iha área transportasaun nian oinsá fasilita transporte sira husi Kupan bele mai direita iha Timor-Leste (TL) no husi Timór bele tama Kupan.

“Ha’u simu ona informasaun ida ne’e no ha’u sei asina memorandu ida ho Ministru Transporte Komunikasaun Indonézia kona-ba asuntu ida ne’e, oinsá maka bele fasilita transporte sira husi Indonézia tama mai no husi ita-nia bele tama ba iha sira-nian”, ministru dehan ba jornalista sira iha Palásiu Governu, ohin.

Nia dehan liuhusi MoU ne’e maka hahú implementa ida ne’e, tanba Timor-Leste no Indonézia iha ona programa kooperasaun ida naran cross border, oinsá maka ultrapasa transporte sira liuhusi terrestre ho diretamente.

Tuir Ministru José Agostinho katak memorandu ba iha kestaun ida ne’e tau ona ba iha ajenda Konsellu Ministru hodi atualiza ba Primeiru-Ministru, atubele haree data saida maka MTK Timor-Leste no Indonézia atu asina.

Tanba ida ne’e liga ba Governu nasaun rua, presiza haree didi’ak no apár mós tuir ajenda Indonézia nian, bainhira maka posivel.

“Agora, ita sei haree iha dezembru maski loron boot, mas nu’udar membru Governu laiha feriadu, mas ba ita sedu, di’ak liu”, governante ne’e dehan.

Kona-ba taxa ba transporte husi Indonézia tama mai Timór no husi Timór ba Indonézia ne’e sei diskute iha nivel tékniku.

“Atu aplika taxa hira, ida ne’e tékniku sira maka deside depois de asina memorandu ne’e”, Ministru Jose Agostinho konklui.

Tuir Ajénsia Notísia Indonézia-ANTARA katak Governu TL no Governu Provínsia Nusa Tenggara Timur (NTT) konkorda atu loke asesu transporte terrestre liga ba rai rua ne’e.

Diretór Transporte Provínsia NTT, Isyak Nuka, ba ANTARA ne’ebé TATOLI sita, akordu ne’ebé planeia sei halo teste iha semana datoluk janeiru 2020.

Nia hatutan, ida ne’e relasiona ba planu Governu nian atu loke asesu ba transporte terrestre atu liga rai rua ne’ebé fronteira ho rai de’it ne’e.

“Ami foin fila husi Dili hodi diskute planu transporte bis entre-nasaun. Ami konkorda ona katak orsida sei iha bis entre-nasaun ne’ebé atende pasajeiru husi Kupan bá Dili no vise-versa”, katak.

Durante ne’e, pasajeiru sira utiliza servisu Timor Travel nian, tantu husi Kupan no mós Dili. Pasajeiru husi Kupan tun iha Mota-Ain depois hakat bá zona neutra Batugadé atu sa’e transporte hanesan mai Dili no Timor-Leste bá mós hanesan.

Jornalista :  Natalino Costa

Editora : Maria Auxiliadora

1 KOMENTÁRIU

  1. Apresia ho inisiativa ne’e. Maibe ha’u nia kestaun maka dala ruma Travel sira ho xapa Indonezia tama liu to’o Timor-Leste iha bainhira pasajeiru barak. Ha’u hein katak jornalisa Tatoli nian bele husu to’ok mos ba autoridade kompetente sira se kareta fuzu boboot sira be tula sasan mai Timor-Leste ne’e selu taxa liuhusi mekanizmu saida ba ita-nia estadu, tanba tuir ita hatene katak kareta husi parte ita-nia atu tama ba sira-nia rai ne’e ninia prosesu ne’e komplikadu loos.

HAKEREK NO HATÁN

Please enter your comment!
Please enter your name here