Prezidente CDN-CNRT atuál Ministru Negósiu Estranjeiru no Kooperasaun, Dionísio da Costa Babo. Imajen/ Tatoli Egas Cristóvão

DILI, 19 dezembru 2019 (TATOLI) – Ministru Negósiu Estranjeiru no Kooperasaun, Dionísio Babo Soares, rekoñese orsamentu ne’ebé ministériu propoin hamutuk $28.223.830 ihay Orsamentu Jerál Estadu (OJE) 2020 la sufisiente no bele fó impaktu maka’as ba rai li’ur.

“0Infelizmente orsamentu ne’ebé Ministériu Negósiu Estranjeiru no Kooperasaun (MNEK) sei ezekuta ba programa sira ne’ebé iha ona. Maibé, ami tenke kesi kabun tanba orsamentu ne’e ninia impaktu maka’as la’ós de’it iha rai laran, maibé mós iha rai li’ur”, tenik Dionísio iha Palásiu Governu, kinta ne’e.

Governante ne’e fó ezemplu katak, kada tinan bainhira atu arrenda embaixada ruma iha estranjeiru, ninia kustu sempre sa’e ho valór osan dolar amerikanu tanba bainhira atu troka ho ema nia osan iha fatin ne’ebé embaixada iha bá, kada tinan sempre sa’e no inflasaun iha rai sira ne’e mós kada tinan sempre sa’e.

“Tanba ne’e mak ita sei problema oituan iha osan, maibé agora tenke futu kabun tanba Primeiru Ministru, Taur Matan Ruak fó ona orientasaun katak ita tenke ajusta ita nia orsamentu nune’e ita la halo planu barak”, nia akresenta.

Ministru ne’e dehan tan, orsamentu ne’ebé MNEK propoin ba tinan 2020 laiha redusaun maibé hakarak aumenta ninia vizibilidade internasionál, nune’e bele investe barak liu iha politika internasionál atu bele projeta país, tanba ne’e presiza investe maka’as iha rekursu umanu.

“Ezemplu mak hanesan nasaun Kuba, nu’udár nasaun ne’ebé ki’ik hanesan Timor-Leste maibé laiha rendimentu barak maibé ninia misaun estranjeira ne’e iha 115 iha mundu. Tanba ne’e mak halo sira ninia vizibilidade ne’e maka’as tebes iha mundu, oin seluk ho nasaun avansadu sira hanesan Amérika ne’ebé osan barak no bele halo buat hotu. Tanba ne’e importante tebes, se la’e Timór sai izoladu liután husi mundu”, Dionísio realsa.

Jornalista: Cipriano Colo

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here