Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 19 dezembru 2019 (TATOLI) – Ministériu Negósiu Estranjeiru no Kooperasaun (MNEK) iha prioridade ba tinan 2020, atu prepara forma tan diplomata na’in-50.

Ministru Negósiu Estranjeiru no Kooperasaun, Dionísio Babo Soares, hateten Timor-Leste presiza tan diplomata, atu nune’e labele izola nasaun husi mundu.

“Ita sei prepara tan ita nia diplomata foun iha tinan oin, tanba ita nia diplomata sira mós barak mak katuas hotu ona, balun reforma tiha ona, no balun to’o ona nível aas hanesan embaixadór. Bainhira to’o ona nível aas, sei labele fila-fali atu halo servisu hanesan tékniku nian, bele halo maibé volume ne’e sei la hanesan ona uluk. Tanba ne’e ita presiza prepara tan ba projetu tinan lima oin mai”, tenik Dionísio iha Palásiu Governu, kinta ne’e.

Governante ne’e rekoñese katak, diplomasia ne’e la’ós buat fásil, tanba ne’e tenke prepara didi’ak no nasaun tenke investe duni ba ema.

Nia informa, oras ne’e daudaun MNEK iha diplomata hamutuk na’in-250 no husi númeru ne’e na’in-70 resin iha hotu rai li’ur.

“Ita mós atu prepara-an hodi tama ba ASEAN, sei iha enkontru rihun ida resin kada tinan ne’ebé presiza ita nia diplomata sira atu atende. Tanba ne’e, presiza tebes atu reforsa Embaixada Timor-Leste nian iha estranjeiru, liuhosi forma ita nia diplomata sira”, nia akresenta.

Kona-ba orsamanetu montante espesífika ba formasaun diplomata sira, Dionísio la sita detalla.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here