Xefe Suku Colmera, Arménio A. da Costa,. Imajen/TATOLI

DILI, 19 dezembru 2019 (TATOLI)-Xefe Suku Colmera, Arménio A. da Costa, ho nia konsellu Suku Colmera, autoriza negosiante ambulante roupa ho sapatu natal nian atu utiliza area Merkadu Tais Colmera. La’ós estrada protokolu Colmera nian.

“Ha’u autoriza negosiante sira fa’an iha Merkadu Tais Colmera nian, maibé ida ne’e mós sira mai beibeik hodi husu lisensa. Nu’udar umanu, ha’u sente ladi’ak. Ikus ha’u dehan ba sira, bele fa’an maibé labele liu dalan públiku no ha’u mós limita fatin ba sira mak dalan protokolu,” hateten Xefe Suku Colmera, Arménio A. Da Costa, ohin, ba TATOLI iha Sede Suku, Colmera, Dili.

Daudaun ne’e tuir lista Suku nian katak baraka 70 maka hala’o hela sira nia atividade negósiu ho nia devér maka selu ‘kuota’ $2,00/baraka ba iha Konsellu Polisiamentu Komunitária (KPK) no juventude Suku Colmera nian para sira hodi halo seguransa ba negosiante nia baraka.

Nia parte to’o oras ne’e seidauk autoriza negosiante sira atu fa’an tama to’o estada protokolu area Colmera nian tanba estrada públiku  proibidu atu halo atividade negósiu.

“Ha’u hakarak dehan katak tinan 2019 ha’u la autoriza negosiante roupa atu fa’an iha dalan públiku ka dalan protokolu Colmera nian tanba iha 2018 sira halo konfrontu no ami to’o iha Tribunal, ne’ebé ha’u la autoriza duni fatin ba sira ne’e,” afirma Xefe Arménio A. Da Costa.

Nia  husu ba negosiante roupa labele hamosu problema no husu atu hala’o tuir regra ne’ebé mak autoridade sira fó. Maibé sira kontinua fa’an iha dalan protokolu maka 2020 sira sei la fa’an tan iha Colmera.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here