Agresaun fízika. Ilustrasaun

DILI, 19 dezembru 2019 (TATOLI)-Seguransa HNGV (Ospitál Nasionál Guido Valadares) hetan agresaun fízika husi família pasiente iha aredór HNGV nian mais ou menus tuku 21 kalan, OTL (Oras Timor-Leste).

“Ami-nia servisu ne’e ami tenke haruka família pasiente ne’ebé vizita moras ne’e tenke fila tanba iha vizita ne’e to´o iha tuku sia kalan. Maibé ami haruka sira fila, família pasiente simu hasoru ami ho problema, baku ami seguransa sira to´o kanek,” dehan Supervisór Seguransa HNGV, Serafim de Sousa Gama ba media sira iha nia kna’ar fatin HNGV, ohin.

“Depois ida ne’e ami kaer família pasiente ne’ebé mak baku ami ne’e ami entrega ba polísia eskuadra Becora hodi halo investigasaun,” supervizór ne´e haktuir.

Nia informa tan “Familia pasiente ne’e problema ho seguransa HNGV entaun ami kaer sira mai entrega iha postu Polísia Ospitál nian depois suspeitu nia maun nain tolu mai ho armas polísia nian mai hodi ameasa tan polísia iha postu ospitál nian entaun ami ta´uk halai hotu. Seguransa HNGV ne’ebé sai vítima na´in tolu tanba família pasiente ne’e kaer mak baku no tuku to´o kamiza seguransa nian nakles”.

“Kazu ne’e ami lori ba investigasaun tanba servisu ne’e ami servisu ba estadu nian no servisu ne’e la’ós ami-nia privadu maibé ne’e ba estadu nian,” nia dehan tan.

Iha fatin hanesan, Koordenadór seguransa HNGV, Cosme Saldanha konta tuir kronolojia: “ Ha’u simu kontaktu liu tuku sia ho balun kalan no akontesimentu ida ne’e membru seguransa sira fó hatene ba família pasiente sira tanba oras vizita hotu ona entaun ba hateten para fila ba uma hodi moras sira mós deskansa tanba ida ne’e mak família pasiente la simu hodi baku seguransa ospitál nian.

“Maibé sira fila responde fali ba membru seguransa sira entaun halo konfrontu fali ho seguransa sira ne’e hodi baku no tuku seguransa sira depois sira kontaktu tan sira-nia família polísia na´in tolu mai ho armas hanesan pistola hodi ameasa iha aredór HNGV nian”.

“Depois ita-nia Polisia sira ne’ebé mak iha postu Ospitál ne’e ba fó hatene sira maibé sira mai ameasa tan ita-nia polísia ne’ebé hela iha postu Ospitál ne’e”.

Nia akresenta, HNGV ne´e ospitál nasaun nian tanba ne´e nia sujere ba “responsável lutu nasaun” nian atu bele koopera ho seguransa HNGV tanba, tuir nia, sira la´ós seguransa ba privadu maibé nasaun. Sira baku seguransa hanesan mós sira baku instituisaun, baku nasaun tanba ne’e bebeik ona.

“La’ós polísia hothotu maibé oknum balun iha ne’e tanba nu’udar funsionariu públiku nu’udar lutu nasaun ita mai halo fali problema iha ne’e entaun se mak atu fó seguransa ba ida ne’e,” friza Cosme Saldanha.

Cosme haklaken, instituisaun HNGV ne’e tenke eziste duni ema labele halo barullu iha ne’e. Iha tinan-1975 ospitál ne’e ema la problema mai to´o iha tinan -1999, ema la iha problema mai tan to´o iha tinan-2005. “ Ema la iha problema, ami servisu nafatin ho di´ak depois ikus akontese polísia mak mai halo fali problema ida ne’e ha’u nu’udar kordenadór seguransa la satisfás ho hahalok ida ne’e no problema sira hanesan ne’e husu para halo investigasaun kle’an”.

“Ezemplu ita kompara ho nasaun seluk ema mai haree hakerek iha ne’ebá katak oras to´o fila ona maibé ita Timór la iha mai haksesuk malu tan ho seguransa”.

Koordenadór seguransa HNGV, Cosme Saldanha salienta, regras hirak ne’e ita tenki halo tanba moras sira ne’e tenke hetan tratamentu no mai iha ospitál ne’e presiza deskansa la’ós família mak tenke mai barak ita la’ós bandu sira maibé oras lorloron ne’e oras 12 meiudia to´o 2 oras lorokra´ik ne’e. Ita fó tempu ba sira vizita depois ida ne’e sira fila ba uma depois lorokra´ik tuku lima bele vizita to´o tuku sia kalan sira fila ba uma para moras sira ne’e mós presiza deskansa.

“Balun ne’e mai tuur hotu kama leten, na´in rua, na´in tolu no balun ne’e mai fuma sigaru iha aredór HNGV ne’ebé bandu labele fuma maibé seguransa sira fó hatene sira hateke maran hela. Mentalidade ita hanesan ne’e, banhira mak nasaun ne’e atu la’o ba oin”.

Entretantu, seguransa HNGV ne’ebé sai vítima ba agresaun fízika ne´e hamutuk na´in tolu mak hanesan Crispin da Costa Celestino Saldanha, Joaquim Fernandes Freitas no Alexandre das Neves.

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here