Sekretáriu Estadu ba Protesaun Sivíl, Alexandrino Xavier de Araújo. Imajen/António Goncalves

DILI, 19 dezembru 2019 (TATOLI) – Sekretáriu Estadu Protesaun Sivíl (SEPS), Alexandrino de Araújo Xavier, hateten Orsamentu Jerál Estadu 2020 ba SEPS hetan redusaun millaun $3,6-resin husi millaun $15 ne’ebé antes ne’e aprezenta ona ba Parlamentu Nasionál.

“Ha’u sente kualkér orsamentu kuandu iha redusaun sempre afeta, tanba ne’e ita presiza redús programa no planu inklui buat balun ita sei labele hala’o iha 2020”, SEPS Alexandrino hafoin soru-mutu ho Xefe Governu, Taur Matan Ruak, iha Palásiu Governu, ohin.

Iha inísiu proposta OJE 2020, SEPS iha millaun $15, mas redús tiha millaun $3,6-resin husi kapitál dezenvolvimentu, kapitál menór no sasán no servisu ho saláriu no vensimentu.

“Ha’u fiar sei prejudika, maibé ho esperansa nafatin hodi kontaktu ho Primeiru-Ministru para orsamentu ruma karik iha rezerva ka kontijénsia ami husi Protesaun Sivíl hatama dadus para bele fó apoia ruma”, sujere.

Redusaun orsamentu ne’e, sei afeta planu boot liu iha tinan oin hanesan, dahuluk, atu estabelese no konstrui edifísiu ida iha fronteira tanba tinan ne’e loloos asina ona akordu ho Indonézia hodi estabelese kooperasaun iha fronteira Mota-Ain iha Suai no Oe-Cusse, mas muda fali ba janeiru 2020 tanba orsamentu hetan redusaun.

Daruak, afeta mós ba planu atu estabelese no konstrui edifísiu Protesaun Sivíl iha Munisípiu Viqueque, Manufahi-Suai no Baucau inklui Lautem tanba edifísiu atuál ne’e kondisaun la di’ak.

Datoluk, afeta ba planu atu loke foun instalasaun Bombeiru iha Munisípiu Ermera no Manatuto iha 2020 hodi bele iha 2021 mak loke fali ida iha Liquiçá atu kompleta ona Bombeiru iha territóriu Timor-Leste.

“Só problema mak orsamentu ne’e ko’a bele afeta ba planu ne’e, maibé ezijénsia mai husi povu ne’e hakarak loke Bombeiru iha sira-nia munisípiu iha tinan ida ne’e”, katak.

Nune’e, nia dehan: “Mas orsamentu ne’e ko’a, entaun ami tenke hanoin filafali no ha’u ko’alia ho Primeiru-Ministru karik bele no iha orsamentu ruma ita bele hala’o daudaun ona, konstrui edifísiu iha área hirak kondisaun ladi’ak inklui edifísiu Bombeiru nian”, sujere.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here