Sesaun plenária Parlamentu Nasionál. Imajen/Tatoli

DILI, 19 dezembru 2019 (TATOLI) – Bankada Opozisaun FRETILIN, konsidera desizaun Parlamentu Nasionál (PN) atu mantein nafatin orsamentu privativu inkonsisténsia.

Liuhosi votasaun iha plenária, Projetu Rezolusaun n.º 49/V (2ª), ne’ebé konsege halo redusaun no ajusta dotasaun orsamentu ba despeza no reseita PN ba tinan fiskál 2020 ho totál $15.671.125, la pasa ho votu a-favór 18, kontra 30 no abstensaun 10, tanba maioria deputadu la konkorda ho redusaun orsamentu ho razaun labele sakrifika funsionamentu Parlamentu hodi ezerse funsaun lejizlativa, akompañamentu fiskalizasaun no kontrola atividade ezekutivu.

Nune’e, vigora nafatin Rezolusaun nº 36/2019, 19 setembru, ho previzaun anuál ba despeza no reseita ho totál $16.486.896.

“Ne’e la konsistente, tanba ministériu sira define orsamentu konforme programa, maibé agora alterasaun ida ne’e prejudika bom funsionamentu no Parlamentu mós tenke hanesan ne’e. Agora ita ezije ba Governu, maibé Parlamentu oin seluk fali”, tenik Vise-Xefe Bankada Parlamentár FRETILIN, Francisco Miranda Branco, liuhosi konferénsia imprensa, iha salaun bankada, kinta ne’e.

Notísia Relevante: Orsamentu Privativu PN Mantein ho Millaun $16.486.896

Deputadu Bankada opozisaun ne’e realsa, Parlamentu loloos tenke hatuur-an hanesan órgaun soberania.

“Desizaun ne’ebé ita hasai tiha ona, ita mós tenke asume responsabilidade no hotu-hotu tenke redús”, Deputadu Branco akresenta.

Reprezentante Povu ne’e preokupadu ho orsamentu privativu PN nian, tanba orsamentu Prezidénsia Repúblika konsege hetan redusaun.

“Nusa Parlamentu labele hatún, nune’e tratamentu hanesan entre órgaun soberania hotu”, nia dehan tan.

Hatan ba preokupasaun ne’e, Prezidente Parlamentu Nasionál (PPN), Arão Noé de Jesus da Costa Amaral, hateten prosesu redusaun ba orsamentu privativu PN, halo ona dezde simu envelope fiskál hosi Governu maibé desizaun plenária mak soberanu.

“Ha’u lakohi komenta kona-ba desizaun plenária nian, tanba plenária mak deside no submete ba desizaun”, PPN subliña.

Entretantu orsamentu privativu PN nian millaun $16.486.896, kompostu kategoria saláriu no vensimentu millaun $5,945, bens no serbisu millaun $8,271, transferénsia públika millaun 1,174, kapitál menor millaun $1,016 no kapitál dezenvolvimentu $80.000

Nune’e, hosi totál orsamentu ba tinan 2020, medida prinsipál setoriál PN iha tinan oin mak ezerse funsaun konstitusionál Parlamentu nian liuhosi reforsa kapasidade interna, hala’o fiskalizasaun ba asaun Governu nian, fiskaliza serbisu administrasaun públika, implementa polítika jéneru iha PN, promove kultura no transparénsia, promove parsipasaun sosiedade sivíl iha atividade parlamentár no lejizlativa, toma atensaun ba desizaun polítika no fiskaliza asaun governativa.

Alokasaun orsamentu kada programa mak hanesan relasaun internasionál no kooperasaun ho dotasaun inisiál millaun $7.730.200, garante ezersísiu kona-ba funsaun konstitusionál PN nian ho millaun $2.157.404, promove kultura no transparénsia PN nian millaun $2.441.468, implementa polítika jenéru PN nian ho orsamentu $78.238 no programa boa governasaun no jestaun institusionál millaun $4.079.568.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Ita la hatene titulu ida hanesan reprezentante povu nian ba sira ne’e sira merese ka lae tanba ho hahalok ida hanesan ne’e ita bele dehan katak sira hanoin de’it maka sira-nia an, alias egoista.

HAKEREK NO HATÁN

Please enter your comment!
Please enter your name here