Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, Dili, Kuarta (18/12/2019). Imajen/TATOLI Egas Cristovao

DILI, 19 dezembru 2019 (TATOLI) – VIII Governu Konstitusionál deside ona loron toleránsia pontu iha loron 24, 26 no 30 dezembru 2019 no loron 2 janeiru 2020.

Komunikadu ne’ebé fó sai husi Prezidénsia Konsellu Ministru hateten, Lei n.º 10/2005, loron 10 agostu nian, tuir redasaun hosi Lei n.º 3/2016, 25 maiu, estabele loron sira ne’ebé nu’udar loron feriadu nasionál no loron ofisiál komemorativa sira, ne’ebé hatuur mós kondisaun hotu  bele fó toleránsia pontu.

“Natál nu’udar solenidade ida ne’ebé importante tebetebes ba komunidade Kriataun tanba iha loron ne’e maka selebra Jesus Kristu nia moris, hodi selebra Misa Natal. Konsidera katak, Natál nu’udar festa família, tuir tradisaun konsagra hanesan loron ne’ebé membru família sira hotu halibur-malu”, haktuir nota ne’ebé Agência Tatoli asesu.

Governu konsidera mós katak, Tinan Foun nu’udar loron hodi agradese ba tinan tuan ne’ebé liu ona, hodi simu tinan foun ne’ebé to’o mai daudaun no mós konsidera hanesan loron festa no serimónia relijiozu.

Nune’e, hodi haktuir saida maka hatuur ona iha artigu 7.º, iha alinea a) no c) iha n.º 2 rasik no iha alinea d) hosi n.º 6 iha artigu ne’e duni,hosi Lei n.º 10/2005, loron-10 agostu nian, tuir redasaun hosi Lei n.º 3/2016, loron-25 maiu nian nune’e, Primeiru-Ministru, Taur Matan Ruak determina sei fó toleránsia pontu iha loron-24, 26 no 30 dezenbru 2019, loron tomak no toleránsia pontu mós iha loron 2 janeiru tinan 2020.

Despasu hosi Governu ne’e, abranje ba funsionáriu hotu no ajente hosi ministériu sira ka servisu ne’ebé nia depende ba, no mós ba institutu no organizmu sira ne’ebé integra iha administrasaun indireta Estadu nian.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here