Ministra Armanda Berta dos Santos, entrega materiál konstrusaun ba familia vitíma dezastre naturais iha Munisípiu Ermera. Imajen/Mídia MSSI

DILI, 19 dezembru 2019 (TATOLI)-Ministra Solidariedade Sosiál no Inkluzaun (MSSI), Armanda Berta dos Santos, entrega diretamente apoiu materiál konstrusaun ba uma-kain 727 ne’ebé sofre dezastre naturaís (anin sobu no inséndiu) durante tinan 2018 ho 2019.

Notiísia Relevante : Governu Preparadu Apoia Vitima Dezastre Naturál

Komunikadu imprensa husi gabinete komunikasaun sosiál MSSI nian, haktuir, vítima sira ne’ebé simu apoiu ne’e, kompostu husi Postu Administrativu Ermera Vila 178, Letefoho (130), Railaco (31), Atsabe (48), no Hatolia (340).

Husi númeru ne’e, uma ne’ebé estragu ho kategoria aat total 245, aat natoon (55) no aat kaman (427). Tantu, MSSI distribui kalén, pregu, besi, ai-kuadradu ho osan mão de obra.

Ministra MSSI Armanda Berta dos Santos hatete, governu liuhusi MSSI, Sekretária Estadu Protesaun Sivíl ho Ministériu Administrasaun Estatál kontinua koordena malu hodi fó protesaun ba nia sidadaun hotu ne’ebé sai afetadu hosi dezastre naturaís. Nune’e, bele ajuda satan netik todan ne’ebé komunidade no vítima sira enfrenta.

Emercio Soares, nu’udar komunidade no vítima, apresia ba oitavu governu ne’ebé la taka matan ba sira nia preokupasaun hodi ajuda ona sira, hodi tulun hadi’a hikas sira nia uma ne’ebé hetan estragu.

Kuantidade ba materiál konstrusaun ne’ebé distribui iha Ermera hanesan kalén zinku 0,30 iha tahan 36350, pregu-kalén iha 1454 kg no pregu-ai 7 cm (séntimu ) hamutuk 1200 kg, pregu-ai 10 cm (séntimu) iha 600 kg, pregu-ai 12 cm (séntimu) 600 kg, no besi (8 mile) hamutuk lolon 2450, besi (12 mile) lolon 2940, arame rolu 490, ho simente iha saka 6125. Nune’e mós, orsamentu mão de obra ho ai-kuadradu hamutuk $174,450.00

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here