Ministru Ensinu Superiór, Siénsia no Kultura, Longuinhos dos Santos. Imajen/Tatoli.

DILI, 19 dezembru 2019 (TATOLI) – Ministru Ensinu Superiór, Siénsia no Kultura, Longuinhos dos Santos, informa Konsellu Ministru fó ona kompeténsia mai MESSK atubele asina akordu protokolu kooperasaun ho Reinu Tailándia atu fó bolsa estudu ba timoroan sira iha Walailak University International College (WUIC).

“Kooperasaun ba bolsa estudu ne’e ita uza tipu bolsa estudu parsiál, signifika katak kustu despeza 50% responsabiliza husi Reinu Tailándia no 50% husi Governu Timor-Leste”, Ministru Longuinhos informa iha Palásiu Governu, ohin.

Bolsa estudu ne’e nia dehan, daudaun Governu Tailándia halo ona selesaun ba estudante timoroan 32 liuhusi kooperasaun ho Ministériu Ensinu Superiór Siénsia no Kultura (MESSK) atu haruka ba iha WUIC iha tinan oin.

MESSK friza, agora, halo ona selesaun ba estudante liuhusi responsabilidade Governu Tailándia ho kooperasaun mós MESSK. Depois halo ona akordu ida ne’e, haruka ona estudante 32.

“Fó ona kompeténsia ne’ebé ha’u haruka ona karta ba Ministériu Negósiu Estranjeiru no Kooperasaun para fó kompeténsia ba Embaixadór Timor-Leste nian iha Tailándia atu reprezenta Governu liuliu MESSK atubele asina akordu ona ho Reinu Tailándia atu haruka ona estudante ba iha ne’ebá”, adianta.

Longuinhos dos Santos salienta mós kona-ba asinatura protokolu kooperasaun MESSK no Universidade Portugál maka hanesan, Universidade Minho, Porto, Évora, Algarve no Institutu Politékniku Porto ne’ebé simu estudante bolseiru timoroan sira.

Asinatura akordu ne’e ho objetivu operasionaliza pagamentu ba universidade sira no koordena oinsá progresu kona-ba estudu estudante sira-nian.

“Fó kompeténsia ona ba Ministériu Finansa atubele halo pagamentu diretu tanba ita-nia estudante timoroan sira eskola iha instituisaun lima refere”, dehan nia.

Entretantu, nia dahan iha tinan ne’e, Governu halo pagamentu ba bolsu estudu iha nasaun estranjeiru sira ne’ebé timoroan estudu ba pur volta millaun $6,7.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here