Ministru Transporte no Komunikasaun, José Agostinho da Silva. Imajen TATOLI/Egas Cristovão

DILI, 19 dezembru 2019 (TATOLI) – Governu Timor-Leste kompromete sei buka dalan hodi rezolve problema kondisaun aviaun Sriwijaya, nune’e bele garante seguransa ba pasajeiru sira.

“Ita haree, karik la seguru ona atubele fasilita pasajeiru sira, liuliu iha kestaun protesaun no seguransa, ita bele buka solusaun ne’ebé maka di’ak hodi labele fó ameasa ba vida pasajeiru sira ne’ebé viajen”, Ministru Transporte no Komunikasaun, José Agostinho da Silva, dehan iha Palásiu Governu, ohin.

Maski nune’e, ministru antesipa ona hodi prepara alternativa seluk hodi fó atendimentu ba pasajeiru iha tempu badak.

“Klaru, iha tempu badak air lines balun sei bele mai halo atendimentu ba pasajeiru sira, nune’e bele asegura nafatin sira-nia seguransa no protesaun”, garante.

Nia dehan alternativu ida ne’e mós sei depende ba komunikasaun no kooperasaun ne’ebé maka iha, tanba imposivel ba Governu atu responde imediatamente problema sira hanesan ne’e, tanba asuntu saida de’it presiza liuhusi prosesu.

Sobre kontratu ho Sriwijaya, governante ne’e hateten iha nesesidade atu ezekutivu estuda no tetu didi’ak iha área téknika no judisiál nian, nune’e bainhira foti desizaun karik, sei la sai husi regra.

Foin lalais iha 16 dezembru, aviaun Sriwijaya halo kanselamentu ba vou husi Denpasar-Bali mai Dili tanba atraza iha rotasaun.

Jerente Sriwijaya iha Timor-Leste, Dirham Wahyudi. Imajen/Natalino Costa.

Nune’e, tuir jerente Sriwijaya, Dirham Wahayudi, katak jestaun Sriwijaya deside hodi halo adiamentu ba semo Denpasar-Dili ba fali 17 dezembru no kona-ba billete ne’ebé pasajeiru sira selu ona fó fali no Sriwijaya mós lori pasajeiru Denpasar-Dili bá toba otél.

Aléinde ne’e, iha 17 dezembru kuandu aviaun Sriwijaya atu arranka husi Denpasar mai Dili iha problema uitoan iha GPU.

“Problema iha aviaun nia instrumentu Ground Power Units (GPU) la lakan kuandu pilotu halo check ba aviaun, tanba ne’e aviaun provizóriu hadi’a no ikus bele semo fali”, Dirham klarifika.

Nia hatutan ho insidente ne’e pasajeiru Sriwijaya Denpasar-Dili hamutuk 183 atu arranka mai Dili, na’in-123 maka sa’e fali Sriwijaya no pasajeiru 60 tenke hela tanba ta’uk ho kondisaun aviaun nian.

“Ami esplika ba sira no pasajeiru 123 maka konsege sa’e Sriwijaya no to’o ho kondisaun di’ak no sira kontente husi Denpasar mai Dili”, nia relata.

Enkuantu pasajeiru 60 seluk ta’uk lakohi sa’e Sriwijaya no husi parte Sriwijaya responsabiliza hodi koordena ho parte Citilink hodi lori sira husi Denpasar mai Dili.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here