Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, Dili, Kuarta (18/12/2019). Imajen/TATOLI Egas Cristovao

DILI, 19 dezembru 2019 (TATOLI) – Governu ofisialmente submete ona Proposta Lei Orsamentu Jerál Estadu (OJE) 2020 foun ba Parlamentu Nasionál (PN), ho pedidu karatér urjénsia.

Hafoin Governu halo revizaun, proposta orsamentu foun konsege hetan redusaun ho montante biliaun $1,668, hodi substitui proposta anteriór ho montante biliaun $1,950, ne’ebé Governu deside retira iha diskusaun jeneralidade ba loron daruak iha plenária PN.

Proposta foun ne’e, inklui reseita ne’ebé mai hosi Rejiaun Administrativa Espesiál Oé-cusse Ambeno no Zona Espesiál Ekonomia Sosiál Merkadu (RAEOA-ZEEMS), Uniaun Europeia no empréstimu, hodi kobre ba nesesidade tomak programa no prioridade nasionál VIII Governu Konstitusionál.

Submisaun proposta husi Governu, reprezenta hosi Ministru Reforma Lejizlativa no Asuntu Parlamentár, Fidelis Magalhães, Ministra Finansa Interina, Sara Lobo Brites ho ekipa hosi Ministériu Finansa.

Prezidente Parlamentu Nasionál (PPN), Arão Noé de Jesus da Costa Amaral, hateten desizaun debate ho karaktér urjénsia sei deside iha plenária.

“Proposta mai ho pedidu karatér urjénsia, tanba ne’e mak tuir rejimentu ami baixa ba Komisaun C atu halo apresiasaun, hafoin aprezenta ba plenária hodi halo deliberasaun, konkorda ka lae pedidu de urjénsia ne’e. Bainhira pedidu urjénsia ne’e plenária konsidera no aprova, ami bele halo kalendáriu ba audiénsia no debate maibé limita oituan audiénsia nian”, PPN informa hafoin simu proposta orsamentu husi ezekutivu, iha resintu Parlamentu, kinta ne’e.

Maski nune’e, debate jeneralidade mantein loron tolu no espesialidade loron 10, bazeia rejimentu PN nian.

Tuir planu, aban meza PN haruka proposta orsamentu foun ba Komisaun C, hafoin komisaun sei aprezenta relatóriu no pareser iha segunda oin.

Arão Noé esplika, montante orsamentu 2020 hamutuk billaun $1,668, ne’e mai hosi saldo orsamentu RAEOA-ZEESM ne’ebé rai iha konta RAEOA hamutuk millaun $127.

“Governu hatama ba orsamentu hanesan reseita hamutuk millaun $73 hosi impréstimu, tanba ne’e mak orsamentu ne’e sa’e ba biliaun $1,668, maibé orsamentu loloos ne’e billaun $1,4-resin”, nia akresenta.

Governu liuhosi reuniaun Konsellu Ministru estraordinária kinta ne’e, foin halo aprovasaun orsamentu ba tinan fiskál 2020, ne’ebé aprezenta hosi Ministra Finansa interina, Sara Lobo Brites.

Proposta OJE 2020 foun, haktuir prinsípiu fundamentál lima hanesan, sustentabilidade fiskál iha tempu médiu no longu prazu nian, aliñamentu ho prioridade nasionál sira, kapasidade ezekusaun orsamentál, kapasidade halo absorsaun ba ekonomia lokál no kualidade orsamentu nian.

Antes ne’e, liuhosi relatóriu no pareser hosi Komisaun C, konsidera proposta lei orsamentu boot demais, iha indísiu inkonstituisionál no verba orsamentu la hatúr iha fatin loloos.

Tanba ne’e iha loron 3 dezembru 2019 iha debate jeneralidade, Primeiru-Ministru, Taur Matan Ruak, deklara retira Proposta Lei OJE 2020.

Hafoin retira proposta orsamentu hosi PN, Xefe Governu fó konfiansa ba Ministru Estadu Prezidénsia Konsellu Ministru, Hermenegildo Pereira lidera ekipa ida hodi halo revizaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here