Komandante Polísia Eskuadra Quelicai, Inspetór Polísia Felix dos Santos. Imajen TATOLI/Antónia Gusmão

QUELICAI, 19 dezembru 2019 (TATOLI) – Komandante Polisía Eskuadra Quelicai, Inspetór Polísia Felix dos Santos, informa Polisía Quelicai aplika alerta rua hodi asegura loron boot Natál no tinan foun 2020.

“Ami preparadu ona no daudaun ne’e ami aplika alerta dois, nune’e ami loron-kalan mantein iha eskuadra hodi asegura seguransa iha loron boot”, Felix afirma ba jornalista sira iha Quelicai, ohin.

Alerta rua ne’e deside ona hahú iha 15 dezembru sei to’o iha 10 janeiru 2020. “Tuir loron ne’ebé deside ona maka ami sei tama servisu loron nune’e mós tempu kalan, tanba ami-nia membru la sufisiente bainhira situasaun ruma akontese maka ami sei husu apoia komando munisípiu”, Feliz dos Santos dehan.

Autoridade seguransa ne’e garante hodi asegura durante loron boot, tanba hetan apoia hosi autoridade lokál no populasaun rasik.

Atu seguransa la’o di’ak no hakmatek maka oras ne’e daudaum eskuadra Polísia ne’e mós distribui ona karta sirkulár ida hosi parte igreja ba xefe suku sira.

Aléinde ne’e, atu evita provoka malu hodi hamosu problema iha Postu Administrativu Quelicai, Munisípiu Baucau, maka Eskuadra Polísia Quelicai simu ona karta sirkulár ida hosi igreja katak bandu labele halo prezépiu iha estrada ibun.

Tanba ne’e, karta sirkulár refere fahe ona ba autoridade lokal sira hodi habelar ba populasaun atu tau atensaun.

“Ami iha sirkulár ida, avizu ne’e hosi igreja ne’ebé ami mós hato’o ona ba xefe suku sira hodi habelar informasaun ne’e ba komunidade. Sirkulár ne’e hateten labele halo prezépiu iha estrada ninin, no halo de’it iha igreja, kuandu halo iha estrada ibun maka movimentu joven bá-mai bele mosu problema”, Komandante Polisía Eskuadra Quelicai, Ispetór Felix dos Santos relata.

Totál membru iha Eskuadra Polísia Quelicai hamutuk 13, iha tansporte operasional hanesan karreta ida no apoia ho motorizada.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here