Komandante Polisia Munisípiu Dili, Superintendente Xefe Armando Monteiro ho ofisiais Polisia Militár no Unidade Espesiál Polisia (UEP) hala’o deklarasaun hamutuk hodi alerta zero toleransia ba kualker aktu krimi durante periodu Natal ho Tinan Foun. Imajen/Eugénio Pereira

DILI, 19 dezembru 2019 (TATOLI)- Komandu Polisia Munisípiu Dili, Unidade Espesiál Polisia (UEP) koopera ho Komandu FALINTL-Forsa Defeza Timor-Leste (F-FDTL)  liuhusi Komponente Unidade Polisia Militár (PM) hahú ohin ezekuta parada diretiva númeru 818/CG-PNTL/XI) 2019 hodi asegura seguransa durante periodu  natál no tinan foun 2020.

Notísia Relevante : Segundu Komandante PNTL Dili Husu Komunidade Halo Prezépiu Dook Hosi Estrada

Parada diretiva númeru 818/CG-PNTL/XI) envolve mós Diresaun Nasionál Transporta Terrestre (DNTT), Autoridade Aduaneira (AA), Autoridade Inspesaun no Fiskalizasaun ba Atividade Ekonómika Sanitária no Alimentár (AIFAESA), Bombeiru, Diresaun Nasionál Seguransa Patrimóniu Públiku (DNSPP), Servisu Ambulánsia, Autoridade Munisípiu Dili no Estrutura  Konsellu Polisiamentu Komunitáriu (KPK).

Komandante Polisia Munisípiu Dili, Superintendente Xefe Armando Monteiro deklara katak, kada instituisaun estadu ho diresaun sira ne’ebé temi, hahú ohin ba oin idak-idak sei hala’o sira nia knaar tuir lei haruka.

“Apela ba komunidade kapitál Dili tenke aproveita selebrasaun loron natál no tinan foun nu’udar momentu importante atu konsolida família hodi halo reflesaun Jesus Cristo nia moris ho dame. Ami sei la  tolera ba kualkér aktu krime no sei halo  medida rigorozu ba autór sira ne’ebé tenta halo ajitasaun no distúrbiu iha períodu natál no tinan foun,” afirma Komandante Armando Monteiro durante konferénsia imprensa konjunta iha Komandu Polisia Dili, Caicoli.

Armando Monteiro apela ba abitante kapitál Dili atu koopera no labele koko hamosu konflitu, tanba PNTL no F-FDTL sei la tolera kualkér krime atu mosu iha selebrasaun loron boot ne’e.

Ekipa konjunta ne’e apela ba públiku sira ne’ebé utiliza transporte Estadu no transporte públiku atu hala’o viajen movimentu ba mai tenke respeita sinais tránzitu hodi evita engarrafamentu no asidente.

Armando Monteiro hatutan, bainhira povu hotu-hotu kumpre regra no la halo violénsia no krime sei fó kontribuisaun ba selebrasaun loron boot ne’e atu la’o iha ambiente dame no hodi kontribui ba dezenvolvimentu Timor-Leste.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here