Formandu CNE tuir hela formasaun ToT iha Salaun Lalini-Larugutu, Caicoli Dili.Imajen/Osoria Marques

DILI,19 dezembru 2019 (TATOLI)-Komisaun Nasionál Eleisaun (CNE-sigla portugés) kuarta (18/12) fó ona Treinamentu ba Treinadór (ToT-sigla inglés) hamutuk 32 kompostu Diretór Nasionál, Diretór Munisipal, Delegada,Delegadu no pontu vogál  hosi munisípiu inklui hosi Dili.

Formasaun ne’e realiza iha salaun Lalini-Larigutu CNE, Caicoli Dili, durante loron tolu hahú loron 18 to’o 20 fulan-dezembru 2019.

Vise Prezidente Komisaun Nasionál Eleisaun, Odete Maria Belo, hateten, formasaun ne’e  ho objetivu atu hakle’an  koñesimentu funsionáriu sira-nia hodi  sai formadór di’ak ba instituisaun CNE liliu atu  fó edukasaun sívika ba eleitores iha territóriu.

“Matéria ne’ebé mak ami oferese ba funsionáriu mak oinsá sira sai fasilitadór, oinsá bele dezeña planu rasik iha sira-nia programa, identifika no dezenvolve treinamentu (ToT),” reforsa Vise Prezidente CNE ne’e,  ba TATOLI.

Nia akresenta maske eleisaun jerál sei akontese iha tinan hirak mai tan, maibé formasaun ne’ebé maka CNE halo dadaun atu prepara rekursu umanu ho kualidade hodi responde ba prosesu  eleisaun sira tuir mai.

“Ami tenke fó treinamentu Ida ToT atu bainhira tún ba baze karik sira iha ona abilidade ka koñesimentu ne’ebé mak di’ak,” Nia haktuir.

Iha tinan 2020, CNE mós iha ona planu sei kontinua implementa formasaun hanesan ba funsionáriu sira hodi sai formadór.

Iha sorin seluk, delegada CNE hosi Munisípiu Covalima, Jesuelda Leki Bele,  hatete formasaun ne’e importante atu apoiu servisu instituisaun nian.

“Formasaun hanesan ToT ne’e bele aumenta ami-nia abilidade no koñesimentu atu ita mós bele Implementa iha terenu bainhira eleisaun,”katak Nia.

Jornalista: Osória Marques

Editór:Francisco Simões

HAKEREK NO HATÁN

Please enter your comment!
Please enter your name here