Ministru Obra Públika Salvador Eugênio Soares dos Reis Pires. Imajen Tatoli/Egas Cristovao

DILI, 18 dezembru 2019 (TATOLI) –  Ministru Obra Públika, Salvador Eugénio Soares dos Reis Pires, hateten 2020 Ministériu Obra Públika (MOP) la implementa projetu foun tanba hetan redusaun ba Proposta Orsamentu Jerál Estadu (OJE) 2020 nian hamutuk millaun $72 husi millaun $270.

“Ami-nia proposta ida uluk ne’e, iha projetu lubuk hanesan ita-nia bee-moos projetu 57, projetu ba eletrisidade pakote 33 no estrada rurál pakote 41, mas agora halo redusaun ne’ebé laiha projetu foun ba tinan oin”, Ministru Salvador ba Ajénsia TATOLI iha Palasiu Governu, ohin.

MOP simu dotasaun foun OJE 2020 nian husi Ministériu Finansa hodi halo redusaun ba proposta orsamentu tinan oin ho montante millaun $72, ne’ebé antes ne’e aprezenta ona ba Parlamentu Nasionál (PN) millaun $270-resin.

Liuhusi redusaun orsamentu ba MOP, Ministru Salvador friza sei laiha projetu foun ne’ebé bele implementa iha 2020.  Maski, Governu kumpre ezijénsia husi PN, maibé mós tenke esforsu makaas halo redusaun hodi kontribui ba poupansa orsamentu ne’ebé Governu kompromete ona.

Nia dehan iha aprezentasaun ba Komité Revizaun Orsamentu Polítika, defende makaas atu mantén millaun $39.5 husi montante redusaun millaun $72.

“Iha dotasaun OJE 2020 ne’e, ami hetan de’it montante ne’ebe la sufisiente maski atu selu projetu sira ne’ebé daudauk ne’e kompañia sira halo hela”, katak.

Razaun husu mantén millaun $39.5 atu selu ba projetu sira ne’ebé halo husi Governu anteriór mai to’o 2019 ne’ebé iha kontratu.

“Ita-nia setór privadu sira presta hela servisu tuir kontratu ne’ebé iha, entaun iha liña ministériu ami iha obrigasaun tuir ita-nia lei jestaun finanseira 13/2009, 21 outubru”, adianta.

Tuir lei jestaun finanseira katak Governu iha obrigasaun orsamenta kompromisu sira ne’ebé mak Governu tama ho terseira parte para halo obra ida.

“Orsamentu ne’ebé ami hetan millaun $72, ami husu tan fali mantén millaun $39.5 hanesan ne’e atu selu projetu sira la’o hela ne’ebé iha tiha ona kontratu ba tinan oin”, haklaken.

MOP husu mantén orsamentu ne’e ba projetu sira ne’ebé reapropria, projetu sira ne’e tama ona kontratu ne’e, Governu tenke orsamenta para selu tanba iha obrigasaun atu selu.

“Projetu sira ne’ebé atu selu mak projetu estrada, bee-moos no projetu iha diresaun sira ba kapitál menór no bens no servisu ne’ebé halo manutensaun ba estrada, mas osan la to’o atu selu”, katak.

Tuir dadus progresu 2019 no Planu 2020 ne’ebé TATOLI asesu, iha área estrada mak kontinua atu kompleta tiha estrada nasionál “ring road”, kontinua reabilita no halo manutensaun liuhosi programa estrada rural, nune’e selebra kontratu pakote hamutuk 68 (reabilitasaun 65,25 KM; manutensaun periódika 215,70 KM; no manutensaun rutina 300,10 KM).

Estrada nasionál hamutuk trosu/sesaun sanulu-resin-tolu (13) ho nia naruk 419 KM, iha 2018, konsege de’it hetan progresu atuál hamutuk 36,25%, no iha tinan 2019 progresu atuál hetan hamutuk 71,39%, signifika katak halo servisu signifikante tebes ho taxa 35% progresu atuál.

Estudu no dezeñu ba trosu Estrada munisípiu no urbanu (Maliana), la’o hela hamutuk projetu 12, ho naruk 247,70 KM, estudu no dezeñu ba ponte hamutuk 10 ho naruk metru 740 kontinua responde ba manutensaun estrada urbana.

Konkursu públiku ba promove setór privadu ba konkursu ERD (Estrada Rurál ba Dezenvolvimentu) partisipa no atribuidu ba kompañia, lokaliza iha kada munisípiu kompañia na’in husi feto 30% no ho defisiénsia 7% sai manán-na’in no lansamentu ba konstrusaun estrada nasionál Baukau-Vikeke ho distánsia 60KM, no Laulara-Solerema distánsia 28.5KM.

Lansamentu ba estrada munisipál Aipelu-Bazartete ho distánsia 13.5KM no Ermera-Fatubessi ho distánsia kilometru 11.81 no kompleta konstrusaun auto estrada Suai, ponte Hinode, ponte BJ. Habibie.  Teste ba implementa téknolojia Geo-Gell ba estrada rurál iha suku Namanei, postu administrativu Laga, munisípiu Baucau husi JICA. Membru komisaun interministeriál ba dezenvolvimentu Aeroportu Internasionál Nicolau Lobato, Comoro, inklui konstrusaun Portu Baia Tibar.

Kona-ba bee no saneamentu, forma ekipa task force ba halo melloramentu sistema bee-moos iha kapitál Dili hamutuk zona 10, postu administrativu Ataúro, Maubisse (Ainaro)no Railaco (Ermera), hadi’a sistema bomba bee-moos iha fatin hamutuk 18, instalasaun metru kontadór bee ba umakain hamutuk 3,241 no estabelese balkaun (counter) selu reseita bee-moos iha fatin 3 (Sentrál Kaikoli, Komoro no Kuluhun no selebra kontratu instalasaun projetu bee-moos hamutuk pakote 55.

Selebra kontratu ba servisu operasaun no manutensaun ba sistema bee integradu urbanu, Munisípiu Manatuto. Dezeñu detalladu enjeñaria la’o hela, ba konstrusaun sistema bee-moos integradu iha munisípiu sira hahú iha kapitál munisípiu Baucau, Lautem, Viqueque no Manufahi (Same) inklui kapitál Dili no mós kontinua halo sistema tratamentu bee.

Estudu viabilidade no planu mestre ba bee-moos iha munisípiu neen seluk lansa iha tinan ida-ne’e, kontinua konstrusaun projetu bee-moos iha munisípiu no área rurál, halo estudu ba bee rai-okos (ground water) kapitál Dili no bee rai-leten (surface water) ba mota Railako no Gleno no iha prosesu preparativu ba instalasaun dijitál ba sistema pago (billing system).

Sobre eletrisidade, kontinua programa eletrifikasaun nasionál hodi kompleta tiha suku 77 ne’ebé seidauk hetan asesu ba eletrisidade liuhosi preparasaun dezeñu no BoQ ba suku hamutuk 33.

Tinan ne’e, simu no kontinua halo projetu eletrifikasaun nasionál hamutuk 192, husi númeru ne’e ita biban halo hotu projetu 88 iha tinan ne’e no agora hela de’it projetu 116, ne’e inklui Dili no territóriu tomak.

Kontinua mellora ba sistema distribuisaun iha Dili liuliu reabilitasaun liña distribuisaun tuan (Indonézia nian) projetu pakote 22 ho valór kontratu hamutuk 6.830.369.44, la’o hela no progresu atinje ona 77.4%.  Apoiu programa Dili Sidade Seguru liuhosi atividade iluminasaun estrada no dezenvolve termu referénsia (TOR) no prosesu aprovizionamentu la’o hela ba konstrusaun sub-estasaun ida iha Tibar no ida iha Aileu/Gleno.

Selebra kontratu ba estudu viabilidade ba potensialidade dada bee husi Railaku no Gleno hodi harii barrajen ida ne’ebé prodús mós enerjia ho kapasidade instala 50 MW.  Instalasaun ba umakain hamutuk 1.237 ho sistema painél solár ba suku 20.

Instala no troka kontadór pre-pagu hamutuk unidade 4,200 no prepara ba akizisaun kontadór pre-pagu hamutuk unidade 11,000 no dezenvolve TOR ba introdús sistema kombustaun gás ba modu produsaun enérjia.

Prosesu preparativu ba dezenvolvimentu enérjia renovavel (solar park) inklui iha postu administrativu Ataúro, prepara prosesu dizitalizasaun/sistema SCADA no implementa iha 2020 no realiza konkursu públiku ba fornesimentu kombustivel ba sentrál eletrisidade Hera no Betano.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here