Adjuntu Sekretáriu Jerál Federasaun Futeból Timor-Leste (FFTL), Frederico Martins

DILI, 18 dezembru 2019 (TATOLI)–Adjuntu Sekretáriu Jerál Federasaun Futeból Timor-Leste (FFTL), Frederico Martins argumenta katak tinan  2019 hanesan tinan ida-ne’ebé espesiál ba federasaun tanba konsege kria kompetisaun iha rai-laran barak maibé kompara iha 2018 liubá só iha kompetisaun rai-li’ur de’it.

“Iha tinan ida-ne’e momentu ida-ne’ebé espesiál duni ba FFTL tanba konsege kria kompetisaun barak iha rai-laran. Durante 2018 liubá, ita iha kompetisaun sira iha rai-li’ur no rai-laran ladún entaun agora rai-laran mak barak,” Frederico tenik iha edifísiu FFTL, Bairru Formosa, Dili, kuarta ne’e.

Nia informa, kompetisaun ne’ebé FFTL hala’o iha rai-laran mak hanesan jogu juvenil ne’ebé hala’o iha Baucau ba U-14, jogu Telecomcel Cup hala’o iha Timor laran no jogu femininu nian.

Aleinde ne’e, FFTL mós hetan treinamentu hosi Federation International Football Association (FIFA) kuaze dalimak. Nune’e mós, realiza treinamentu ba asosiasaun sira. Enkuantu, treinadór mós FIFA oferese treinamentu ba level B iha ne’ebé foin dahuluk hala’o iha Timor-Leste no sei kontinua tan ba oin to’o 2020.

Nia subliña, tinan 2020, FFTL sei foku liubá kompetisaun doméstika no dahuluk sei hala’o festivál desportu ba U-14 ne’ebé sei hala’o iha munisípiu hotu no sei kontinua nafatin ho kompetisaun Telecomcel Cup. Enkuantu, planu seluk FFTL seidauk deside.

Orsamentu ne’ebé apoiu ba FFTL hodi hala’o atividade 2019 hosi Asian Football Confederation (AFC) ho montante rihun $500. Kada fulan, FIFA apoiu FFTL ho orsamentu hamutuk rihun $50 ne’ebé mak utiliza ba saláriu no vensimentu.

Tanba ne’e, ezekusaun orsamentu 2019 iha FFTL daudaun ne’e atinje ona pursentu 90.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here