Rusa hadau malu bee iha illa Jaco. Imajen/Jogerjo Guterres.

DILI, 18 dezembru 2019 (TATOLI) – Rotary Youth Leadership Awards (RYLA), Cruz Vermelha Internasionál, United Nations Educational, Scientific and Cultural Organization (UNESCO) inklui Lider nasionál Kay Rala Xanana Gusmão, halo ona asaun emerjénsia liuhosi apoia bee no seluk tan atu rusa bele aguenta iha bailoro naruk.

“Iha ne’e ema barak maka mai ona, apoiu oioin de’it, hanesan bee, bidón, profíl no seluk tan, balun halo hela fatin hodi tidin profíl atu enxe bee, hafoin uza mangeira hodi kanaliza ba bidón atu rusa bele hemu”, Responsavel Parke Nasionál Nino Konis Santana nu’udar mós pesoál kontratada hosi Ministériu Agrikultura no Peska (MAP), Lino de Araújo, via-telefónika ba Ajénsia TATOLI, ohin.

Lino relata katak RYLA apoia simentu saku hitu, batako 40, ai-balok 20, profíl ida, bidon-masa tolu, mangeira iha metru 80 inklui materiál seluk, aumezmu tempu konstrui fatin profíl atu enxe bee.

Nune’e mós UNESCO oferese bidón rua no ajuda bee hodi fó rusa hemu, enkuantu Cruz Vermelha Internasionál apoia mós bee ho litru 5000.

Lider karizmátiku, Kay Rala Xanana Gusmão, oferese bee litru 320, bidón tomak iha lima, bidón ne’ebé fera ba rua hodi tau bee iha 52, jerigen iha 42, profíl kinur rua, mangeira rolu tolu, balde 10, kalén 60, kusi-boot rua, foos karón 17, pregu plástiku rua inklui hahán no bebida balun atu ema bele halo serbisu iha Jaco, hanesan dellos, fanta, sprite kaixa neen, supermi iha kaixa 16 inklui bimoli kaixa rua.

Entretantu, tuir ajenda hosi MAP, ohin ministru ho nia ekipa arranka ona bá Jaco atu haree situasaun rusa iha ne’ebá, nune’e mós lori bee no sei entrega ró ida ba guarda florestál atu uza hodi tula bee hosi Valu-Sere bá Jaco.

Jornalista : Zezito Silva

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here