Idózu no ema ho difisiente simu subsídiu iha sukursál BNCTL, iha Dili. Imajen TATOLI/António Gonçalves

DILI,18 dezembru 2019 (TATOLI)-Ministériu Solidaridade Sosiál no Inkluzaun (MSSI) oras ne’e, hasai ona naran idozu no invalidés hamutuk 768 hosi lista pagamentu  ba faze da-ruak nian tanba mate ona no kestaun seluktan.

Tuir lista pagamentu MSSI nian iha faze da-huluk iha fulan-jullu liubá rejista benefisiáriu hamutuk 98.055 maka iha direitu ba subsidiu osan estadu. Na’in 768 mate ona no na’in 1085 naran rejista iha sistema maibé la mosu iha fatin pagamentu hodi simu sira-nia osan hosi ekipa pagamentu Banku Nasionál Komérsiu Timor-Leste (BNCTL) no MSSI iha territóriu.

Notísia Relevante:Idozu no Inválidu 98.055 Simu Ona Subsidíu Husi Governu

Presidente Konsellu Administrasaun Institutu Nasionál Seguransa Sosiál (INSS),  Longuinhos Armando, relata lista pagamentu iha faze da-ruak, iha dezembru 2019 nian tuun ona ba benefisiáriu hamutuk ema  na’in 96.530.

Nia dehan, prosesu pagamentu ba idozu  no invalidés ba ikus iha 2019 MSSI no BNCTL  hahú hala’o ona iha loron 09 fulan-dezembru  no sei termina iha janeiru 2020 iha territóriu.

Hosi totál lista pagamentu ne’e akumula hosi Munisípiu 12 inklui RAEOA. Munisípiu Aileu idozu 3.072 no invalidés 145, Ainaro iha idozu 5.077 no invalidés 310, Baucau iha idozu  12.636 no invalidés 2.114.

Bobonaro iha idózu 9.001 no invalidés 455, Covalima iha idózu 6.261 no invalidés 173,  Dili iha iha idózu 8.190 no invalidés 1.209. Ermera iha idózu 7.238 no invalidés 1.509, Lautém iha idózu 5.527 no invalidés 249.

Hosi Liquiça iha idózu 5.832 no invalidés 527, Manatuto iha idózu 4.258 no invalidés 319, Manufahi iha idózu 5.497 no invalidés 360. RAEOA iha idózu 6.841 no invalidés 113 no Viqueque iha idózu 8.843 no invalidés 8.257.

“Dadaun ne’e pagamentu la’o hela iha timor-laran tomak,tuir kaléndáriu sei termina iha fulan-Janeiru tinan oin,”katak, Longuinhos Armando,  ba TATOLI, iha Caicoli,ohin.

Pagamentu faze da-ruak nian, Governu liuhosi MSSI aloka ona orsamentu hamutuk millaun $ 17-resin, kada benefisiáriu simu $180 ba fulan neen nian tanba  kada fulan simu $30.

Iha Biban seluk, Jestór BNCTL Sukursal Obrigadu Barak Dili, Marcelo da Cruz Carvalho, hateten, prosesu pagamentu ba idozu no invalidés iha Munisípiu Dili nian hahú kedas iha semana kotuk to’o agora la’o ho di’ak.

Kada loron, nia parte selu benefisiária hamutuk rihun ida-resin. “To’o ohin, ha’u bele dehan, pagamentu ne’ebé la’o iha munisípiu Dili besik konklui hosi númeru idózu no invalidés hamutuk 9.399 hela mil itál,”katak Nia.

BNCTL kontinua esforsu hodi fó atendementu di’ak ba idozu no invalidés sira durante prosesu pagamentu hodi prepara kadeira no tenda ba benefisiáriu sira atu tuur.
Jornalista:Nelson de Sousa

Editór:Francisco Simões

HAKEREK NO HATÁN

Please enter your comment!
Please enter your name here