Edifisiu Tribunál Rekursu. Imajen/Espesiál

DILI, 18 dezembru 2019 (TATOLI) – Jurista Timor-oan, Fernando da Costa, husu ba Tribunal Rekursu (TR) atu nakloke-an ba públiku kona-ba prosesu julgamentu sira ne’ebé autór sira hatama iha TR.

Iha julgamentu sira ne’ebé “omólogu” ba TR, tuir Fernando da Costa, tenke transparénsia hodi involve autór sira no nia família sira bele partisipa, atu nune’e, desizaun saida de’it bele fó satisfasaun ba ema hotu tanba sente konvensidu ho lala’ok sira ne’ebé la’o ho transparénsia.

“Bainhira arguido ba kazu ida hatama rekursu, prosesu foti desizaun iha Tribunal Rekursu sempre konfidensiál (taka ba públiku) no halo de’it deliberasaun. Ida ne’e bele hamosu deskonfiansa ba desizaun sira ne’e,”  hateten Fernando da Costa, ba jornalista sira, ohin, iha Tribunal Distritál Dili (TDD).

Nia lia tun dehan, prosesu julgamentu iha Tribunal Rekursu dala barak iha limitasaun atu asesu, dokumentu sira ne’e mos la publikadu hodi ema bele asesu nia prosesu rasik iha ámbitu transparénsia no asesibilidade públiku nee limitadu.

Loloos, Fernando da Costa tenik, presiza nakloke atu nune’e parte rua (vítima no arguido) hatene ho klaru razaun saida vítima manan, no arguido lakon, ou arguido manan no vítima lakon, nee sira presiza hatene razaun fundamental. Tanba normálmente iha rai ne’ebé de’it, julgamentu ba kazu ruma tantu tama iha prosesu Tribunal Rekursu no Supremu sempre nakloke ba públiku.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here