Autoridade Servisu Alfandega halo hela pasa revista ba visitantes sira neebe tama sai iha Fronteira Motaain,Batugade. Imajen/Alex Santos

DILI, 19 dezembru 2019 (TATOLI) – Jerente Jerál Alfándega Postu Integradu Batugade no Salele, Délio Jim Belo, hateten jeradór ne’ebé foin daudaun avaria iha Fronteira Batugadé, agora daudaun funsiona normál ona.

“Ha’u atu klarifika katak jeradór Alfándega ne’ebe aat iha Postu Integradu Batugadé, la’ós Mota-ain, Mota-ain maka iha Indonesia, agora diak ona, funsiona normál”, Délio informa ba Ajénsia TATOLI via telefone, ohin.

Nia dehan jeradór ne’e avaria no tékniku Ministeriu Finansa, Alfándega no kompañia mai hadi’a kedan.

“Agora laiha problema ba jeradór ne’e tanba hadi’a ona ho sistema automátiku, kuandu ahi mate jeradór moris kedan ne’ebé laiha problema”, Delio dehan.

Hodi hatutan daudaun prosesu atendimentu iha Alfándega Batugadé la’o normál.

Nune’e mós Diretór Nasionál Operasaun Alfándega, Julião Ximenes, salienta jeradór Afándega ne’ebé avaria funsiona tiha ona.

“Sim, hanesan saida maka foin daudaun fó sai iha mídia, loos katak jeradór Alfándega nian avaria no kompañia hamutuk ho parte lojístika Ministériu Finansa sira bá haree no hadi’a ona”, katak.

Nia dehan jeradór Alfándega ne’ebé foin avaria iha fulan ida nia laran, tanba ne’e kuandu ahí mate iha loron rua iha dia 8 no 9 foin daudaun difikulta parte Imigrasaun no Alfándega hodi halo servisu ho manuál.

Tanba ne’e, bainhirai simu informasaun, halo kedan koordensaun ho parte lojistika nasional no kompañia hodi rezolve kedan no buat hotu daudaun la’o di’ak.

Maski nune’e, Diretór Operasaun ne’e husu ba Ministériu Finansa tenke buka kompañia definitiva, nune’e karik problema iha jeradór sira bele rezolve.

“Tanba ita daudaun besik loron boot Natál, tinan foun, movimentu ema nian makaas no atividade ekonómika mós sirkula makaas iha fatin, kuandu ahi mate iha ne’ebá karik jeradór bele responde lais”, sujere.

Foin lalais ne’e, Xefe Postu Servisu Imigrasaun  Fronteira Batugadé, Sarjentu Xefe Polísia Moises Barros, hato’o preokupasaun ba jornalista Ajénsia TATOLI, segunda (09/12) katak ho kestaun ahi mate-lakan, afeta ba sira-nia servisu.

Tanba imigrasaun servisu ho sistema jestaun fronteira ka border management system, tanba ne’e, bainhira akontese eletrisidade mate, sistema labele rejista sidadaun sira ne’ebé tama no sai iha área fronteira.

Momentu ne’ebá, Servisu Migrasaun labele rejista eletrónika, maibé taka de’it karimbu ho manuál ba pasaporte vizitante rai-laran no estranjeiru.

“Bainhira la rejista iha sistema, entaun iha tempu ruma Autoridade sira hosi Ministériu Justisa buka tuir sidadaun balun ne’ebé komete krime, ami labele buka tuir tanba agora daudaun ami atende ho manuál”, Polísia Moises Barros katak foin lalais ne’e.

Sarjentu Xefe Polísia ne’e hatutan problema ne’e afeta mós ba pesoál sira  hodi fó atendimentu ida ho lais no rigór ba ema barak.

“Ahi mate komesa domingu (08/10) to’o ohin (segunda 09/12, ami-nia telefone mós  labele karrega, entaun ami sei labele kontrola ema tama sai ho di’ak no másima”, informa.

Polisia Imigrasaun destaka nia pesoál hamutuk na’in-neen iha Postu Fronteira Batugadé no pesoál AA iha na’in-24.

Diretór AA Munisípiu Bobonaro, Alberto Seixas, hatutan karreta tula sasán barak maka para hela, labele rekolla taxa, tanba sistema lala’o no paradu totál.

Atu solusiona problema ne’e, nia sujere ba Governu liuhosi Ministériu Obra Publika (MOP) atu koordena ho Eletrisidade Timor-Leste (EDTL, sigla portugés) hodi fó atensaun séria ba problema ne’e ho lalais.

“Ami-nia pesoál sira revista de’it manuál, ita labele deteta saida de’it maka iha ema nia pasta laran, maibé kuandu ita uza sistema eletróniku bele indika sasán sira iha laran”, afirma.

Aléinde ne’e, karreta tula sasán importasaun husi Atambua no Kupan-Indonézia barak para iha postu Mota-ain durante loron-rua tanba ekipa servisu Aduaneira labele pasa revista ho sistema manuál hodi kobra taxa ba kofre Estadu.

Notísia relevante : Mákina Raiu-xís iha Motain Avaria Besik Tinan Ona

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here