Ekipamentu ou teknolojia modernu ho naran Amplified Geochemical Imaging (AGI) ne’ebé Institutu Petróleu no Jeolojia (IPG,sigla portugés) uza ba peskiza Mina no Gás. Imajen/ espesiál.

DILI, 18 dezembru 2019 (TATOLI) – Institutu Petróleu no Jeolojia (IPG, sigla portugés) finaliza ona instalasaun ekipamentu ou teknolojia modernu ho naran Amplified Geochemical Imaging (AGI) ba bloku tolu iha Vemase, Venilale no Ossu hamutuk 36 iha munisípiu Baucau no Viqueque.

Atividade peskiza ho ekipamentu AGI hahú instalasaun iha (13/12/2019) ho nia objetivu atu hatene ezisténsia idrokarbonu iha rai okos, atividade kalibrasaun ba posu abondona no sampeling mina no gás.

“Agora daudauk, ami komesa ona instalasaun AGI ba bloku A ho totál instalasaun module AGI 36 point ho lokalidade postu 3 hanesan Vemase, Venilale no Ossu iha munisípiu Baucau no Viqueque, ne’e ita finaliza ona durante loron tolu nia laran”, Koodenadór Kampu Peskiza AGI no Divisaun Investigasaun Jeolojia, Unidade Petroleu no Gás, Joanico Pires, ba TATOLI via mídia sosiál, ohin.

Joanico friza daudaun ne’e, ekipa estudu IPG kontinua halo instalasaun iha bloku B ho totál point AGI hamutuk 73 no planu ekipa sei instala iha bloku B ho durasaun loron 9.

“Ami instala ona pontu 19 iha postu Uatulari no ohin ekipa kontinua instala iha postu Quelicai”, katak.

Koordenadór Peskiza AGI ne’e adianta ekipa mós hala’o atividade kalibrasaun ba posu abondona ne’ebé module AGI ho totál 44 ne’ebé instala ba posu rua maka hanesan Aliambata no mós posu abondona well drive iha Betano.

Nia dehan kada posu sei instala module AGI ho metodu cycle ho nia objetivu atu hatene ezisténsia reservoar iha posu refere no agora instalasaun remata ona.

Iha mós atividade sampeling mina no gás ho nia objetivu maka atu hatene genesis (orijen) mina no gás no mós tipu kerogen no agora sampeling hotu ona.

Tuir planu iha 29 to’o 30 dezembru, ekipa sei kontinua instala iha bloku C ho lokalidade Laga no Baguia ho totál pontu 32. Enkuantu atividade retrieval ou foti fali module AGI hahú iha 4 to’o 21 janeiru 2020.

IPG halo peskiza mina no gás utiliza ekipamentu ou teknolojia modernu ho naran AGI hodi identifika ezisténsia mina no gás iha munisípiu Baucau no Viqueque.

Peskiza ne’e halo durante fulan 6 hahú iha loron 10 dezembru 2019 no remata iha juñu 2020, maibé atividade kuda no mós hasai instrumentu AGI iha terrenu ne’e hala’o durante loron 42.

Ekipamentu AGI nu’udar teknolojia modernu ne’ebé utiliza ba esplorasaun jeokímika hodi identifika mina, gás liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Estudu ne’e nu’udar kontinuasaun ba estudu Sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Notísia relevante : Dezembru, IPG Halo Peskiza Ba Mina No Gás Iha Baucau no Viqueque

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here