Ilustrasaun

DILI, 18 dezembru 2019 (TATOLI)—Diretór Eskola Ensinu Sekundária Téknika Vokasionál (EESTV) Gil da Costa “Oan Soru” Munisípiu Ainaro, Alcino de Araújo, informa hafoin tinan rua ESTV Gil da Costa “Oan Soru” eziste iha Munisípiu Ainaro, rezultadu agríkola ne’ebé sira kolleta hodi apoiu nesesidade komunidade sira-nian mak modo metan, modo mutin no alfase.

“Rezultadu hortikultura modo no alfase ne’e loloos tuir planu atu lori ba merkadoria. Maibé, dala barak to’o tempu kolleta, komunidade direitamente mai sosa de’it rezultadu agríkola ne’e iha área eskola,” nia dehan ba Ajénsia TATOLI liuhusi entrevista iha edifisiu MEJD, Vilaverde, dili, kuarta (18/12/2019).

Nia hatutan, iha Eskola ESTV iha departamentu rua mak Agrikola no Komérsiu ne’ebé halo produsaun aihan liuliu iha parte agríkola mak aselera depois mak hetan apoiu husi komérsiu oinsá atu hakat ba merkadoria.

“Departementu rua ne’e iha ligasaun. Se tempu kolleta modo sira ne’e atu lori ba ne’ebé? Tan ne’e, parte komérsiu mak sei halo ligasaun ho negosiante sira, atu modo sira ne’e bele tama iha merkadu,” nia dehan.

Maibé, nia haktuir, to’o tempu kolleta, estudante sira ne’e la lori ba merkadu tanba negosiante sira direitamente mai sosa de’it iha fatin. Ne’eduni, parte eskola kria ekipa estudante sira ne’ebé iha tempu pikete mak hodi atende komunidade mai sosa modo.

Tanba ne’e, nia haklaken, nu’udar diretór ne’ebé durante ne’e frekuenta programa agrikola no komérsiu iha eskola refere tanba Governu liuhusi Ministériu Edukasaun reforsa tan ekipamentu handtractor (HT) ba eskola ESTV Gil da Costa “Oan-Soru”. Ida ne’e mudansa boot ida tanba bele fasilita liután estudante sira iha programa agrikultura nian.

“Rezultadu agrikola ne’ebé di’ak tanba prosesu ensinu aprendizajen entre estudante no profesór sira iha seriedade. Apoiu prátika durante tinan rua ba estudante sira hatudu ninia rezultadu. Tanba fasilitasaun materia prátika ba estudante sira la’o tuir duni kriteiru ne’ebé konsagra ona iha ESTV. Katak 60% estudante sira tenke hetan prátíka 33% no teoria 10% ba komportamentu,” nia dehan.

Importante tebes, diretór ne’e esplika, bainhira seidauk hetan apoiu handtractor (tratór liman) husi MEJD sira halo ona kooperassun ho ONG Agrikultura Avansadu husi Amérika mak apoiu hela handtractor ba sira. Ne’eduni, ho polítika VIII Governu Konstitusionál nian liuhusi ajudu handtractor ne’e ba oin sei iha tan mudansa ba eskola ESTV tanba tenke kontinua fila rai foun ne’ebé eskola prepara ona.

Notísia relevante:MEJD Oferese “Handtractor” ba ESTV 10

Jornalista :Tomé Amado
Editór       : Rafy Belo

HAKEREK NO HATÁN

Please enter your comment!
Please enter your name here