Prezidente Promosaun no Venda LFA, Janio Tilman (faru metan liman karuk).

DILI, 18 dezembru 2019 (TATOLI)–Reprezentante Komisaun Konjunta Liga Futeból Juvenil U-16 Timor-Leste, Janio Tilman hateten dezenvolvimentu futeból bele dehan úniku uitoan iha mundu tanba haree hosi adeptu ne’ebé ho eskalaun ida-ne’ebé bele dehan másimu.

“Dezenvolvimentu futeból úniku uitoan iha mundu tanba haree hosi adeptu ne’ebé ho eskalaun bele dehan másimu no boot tanba mundu tomak nia matan hateke hotu kedas. Ha’u la minimiza desportu sira seluk. Maibé, realidade futeból ne’e dada mundu nia atensaun,” Janio ba Agénçia Tatoli iha Bairru Formosa, Dili, kuarta ne’e.

Nia esplika, desportu futeból ne’ebé nia dezenvolvimentu úniku tanba ema hotu iha mundu koñese Cristiano Ronaldo no Lionel Messi maski la fans klube rua ne’ebé jogadór famozu rua ne’e hamahan an ba.

“Ohin loron jogadór rua ne’e la’ós famozu de’it maibé riku. Ida-ne’e tanba indústria haree sira nai’n rua ne’e oportunidade iha. Hosi ezemplu hirak ne’e, ha’u hakarak lori mai Timor-Leste. Tempu ona, povu ida-ne’e, ita hotu, Governu no sosiedade sivíl tau-liman hamutuk atu hatudu ona dalan ida hodi troka pensamentu tuan sira nune’e bele haree dezenvolvimentu futeból iha ita-nia rai,” nia dehan.

Tuir nia, dezenvolvimentu futeból iha Timor-Leste bainhira Governu kria infraestrutura ne’ebé di’ak bele dada atensaun oioin hosi businessman boot (zigante) mundiál sira bele tuur hamutuk atu introdús sira-nia marka (merek).

“Timor, ita bele hateten kompañia barak liu foku ba projetu. Maibé, barak mós hakarak hakat ba internasionál. Ita mós tenke hatene katak Timor agora nasaun ona, la’ós provínsia entaun kompañia sira atu go international ita tenke introdús ita-nia marka iha dezenvolvimentu futeból,” Janio haklaken.

Entretantu, hosi ema barak nia matan seidauk hateke hetan progresu hosi dezenvolvimentu futeból no dehan dezenvolvimentu futeból sei hakdasak iha fatin, maibé nia dehan buat balun la’o hela tan ohin loron Timor-Leste iha ona Liga Futeból Amadora (LFA), mosu tan Liga Futeból Juvenil Timor-Leste U-16 no klube Timor nian ida Lalenok United mós hetan ona lisensa hosi Asian Football Confederation (AFC) hodi ba kompete ho klube hotu iha Ázia.

“Lalenok nia prezensa iha AFC ne’e sinál ida-ne’ebé kaer tiha ona atensaun hosi AFC. AFC organizasaun ida-ne’ebé kaer nasaun tomak iha Ázia nia laran, la’ós Ázia Sudeste de’it. Bainhira Lalenok ho nia prezensa foun ita introdús mós ita-nia identidade iha ne’ebá. Halo naran foun ida-ne’ebé mosu tan iha sistema internasionál. Ho ida-ne’e mak ema jestór internasionál sira komesa haree ona Timor iha ne’ebé,” Janio tenik.

Tanba ne’e, nia hateten, tempu to’o ona ba ema hotu atu troka pensamentu. Bainhira selesaun nasionál ba joga iha rai-li’ur atu manán ka la manán hanesan mós instrumentu ida hosi instrumentu barak ne’ebé atu fó apoiu ba dezenvolvimentu futeból iha Timor.

“Ita labele sukat de’it progresu futeból. La’ós sukat de’it hosi ita-nia selesaun sira ba tenke manán de’it. Ezemplu, seluk se ita padroniza ona ita-nia estádiu ida iha Timor no klube sira barak hetan ona lisensa iha rai-li’ur. Ita bele hetan ona oportunidade atu joga ka sai uma-na’in. Imajina se klube iha Ázia joga AFC Cup ita sai uma-na’in ida iha Timor ne’e previléjiu ida boot ita organiza rasik no ita-nia klube mak joga rasik. Se adeptu sira hosi Ázia tomak mai lori osan hira mai ita-nia nasaun, turista hira mak mai. Ida-ne’e mak ita-nia Estadu tenke hanoin didi’ak kria ona kondisaun ba tanba ita avansa ona ba oin,” nia subliña.

Nia fó ezemplu, nasaun barak iha mundu la koñesidu iha futeból maibé sira organiza Kopa Mundiál ida-ne’e hatudu hosi indústria no foka ba jestór ne’ebé di’ak iha infraestrutura no fasilidade seluk.

Hanesan joven otas nurak ida, ho hakraik an, nia husu ba Governu atu kria lalais ona estádiu di’ak ida ho padraun internasionál iha Timor-Leste nune’e ba oin eventu rejionál sira hanesan Sea Games bele realiza iha Timor-Leste atu fó rendimentu maka’as ba nasaun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here