Tribunál Distritál Dili. Imajen/TATOLI

DILI, 18 dezembru 2019 (TATOLI)-Tribunal Distritál Dili (TDD),  sesta (20/12/2019), sei halo alegasaun final hasoru membru Polisia Nasional Timor-Leste (PNTL) ida ho inisiál JM ne’ebé deskonfia involve kazu violasaun seksuál (VS) hasoru nia prima rasik LSC.

Membru PNTL ho inisiál JM nia defensór Germano Ramos, ohin, iha Tribunal Distritál Dili (TDD)  informa ba jornalista sira katak, iha sesta mai ne’e, prosesu kazu ba nia kliente JM tama ona ba alegasaun, tanba Tribunal “arrola” hotu ona deklarasaun husi vítima, testemuña no parte relevante sira seluk tan.

Informasaun antes husi defeza nee rasik konfirma katak tribunal rona ona deklarasaun JM ne’ebé Ministériu Públiku notifika hanesan arguido, LSC hanesan vítima, inklui halibur faktu.

Tuir kronolojia iha autos ne’ebé aprezenta husi MP katak, iha loron 13 novembru 2013, tuku 9:00 dadeer, hafoin matabixu, vítima LSC halo limpeza dasa rai iha uma laran. Nune’e,  arguido lia tuun ba vítima LSC atu dasa mós arguido nia kuartu laran.

Vítima halo tuir tanba konsidera arguido hanesan primu. Maibé, bainhira vítima hamoos hela arguido nia kuartu, derrepente de’it, arguido tama tuir kaer iha vítima nia kabaas no latan vítima ba kama leten hodi obriga ho forsa  halo violasaun seksual hasoru vítima.

Vítima tanis no arrepende tebes. Vítima hakarak atu halo keixa no komunika ba família sira kona-ba akontesimentu ne’e. Maibé arguido ameasa kedas hodi dehan, “o labele hatete ema, se lae, ha’u tiru mate o”.

Iha fali loron 13 dezembru, tinan hanesan,  tuku 24:00 Otl, vítima toba hela iha kuartu, teki-teki, arguido ho isin molik tama tan vítima obriga  halo relasaun seksuál.

Iha loron ida, bain hira vítima informa akontesimentu ba vítima nia inan hakiak (arguido nia inan rasik), maibé ferik nonook de’it.

Arguido pratika hahalok nee ba vítima durante tinan ida nia laran, maibé arguido nia inan-aman la defende vítima. Nune’e mak vítima halo keixa ba família sira seluk hodi alerta situasaun ne’e to’o polisia.

Konsekuénsia hosi arguido nia hahalok nee, MP akuza arguido ho krime violénsia doméstika ho forma violasaun seksuál artigu 2, númeru 2 alínea A, artigu 3 alínea A, artigu 35 alínea B hosi lei kontra violénsia doméstika lei númeru 7/2010, artigu 41 no 172 hosi Kódigu Penal.

Audiénsia julgamentu ba prosesu ne’e prezide husi Juis Maria Modesta ne’ebé akompaña mós Juis nain rua seluk, Prokuradór titular Bartolomeo de Jesus, substitui ba Prokuradór estajiáriu.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here