Diretór Downstream Autoridade Nasionál Petróleu no Minerál (ANPM), Nelson de Jesus. Imajen/Florencio Miranda Ximenes.

DILI, 18 dezembru 2019 (TATOLI) – Autoridade Nasionál Petróleu no Minerál (ANPM, sigla portugés) liuhusi Diresaun Downstream atribui lisensa operasaun ba postu abastesimentu kombustivel hamutuk 17.

“Ami atribui lisensa hamutuk 17 tanba prienxe ona rekizitu hotu-hotu liuliu ba atividade harii no opera postu abastesimentu kombustivel ne’e ho durasaun tinan sanulu”, Diretór Downstream ANPM, Nelson de Jesus, iha Ministériu Finansa, Aitarak-Laran, ohin.

Nelson de Jesus salienta lisensa operasaun ne’e ba postu abastesimentu ne’ebé ezistente, molok regulamentu ne’ebé fó lisensa ho kondisaun durasaun tinan ida to’o lima tanba sira (postu abastesimentu kombustivel) ho razaun seidauk prienxe rekizitu ne’ebé hakerek iha regulamentu tékniku ba harii no opera postu kombustivel no seidauk iha lisensa ambientál.

ANPM halo monitorizasaun dala tolu iha 2019, no konsege kumpre rekezitu harii no opera. Enkuantu hetan ona lisensa ambientál no nia funsionáriu hetan formasaun ba kombate inséndiu no primeiru sokorru.

“Sira (postu abastesimentu kombustivel 17) iha direitu atu hetan lisensa operasaun sein kondisaun ho durasaun tinan 10 hahú husi sira-nia lisensa ami emite to’o 2029 mak foin bele renova fali”, katak.

Tuir regulamentu tékniku ba hetan lisensa operasaun, iha komponente rua hanesan, konstrusaun no operasaun. Dahuluk, ba konstrusaun ne’e, tenke hala’o inspesaun ba iha oinsá hakoi tanke mina, instala pipa, instala bomba, uma, drainajen inklui sistema tratamentu bee. Daruak, ba operasaun tenke halo kaliberasaun, funsionáriu sira tenke tuir formasaun hamate ahi karik iha inséndiu, formasaun primeiru sokorru, lisensa ambientál.

“Ita tenke aprova uluk dezeñu ba konstrusaun no ekipamentu depois mak halo konstrusaun. Ami kontinua halo monitorizasaun to’o konstrusaun remata mak foin tama fali operasaun”, adianta.

Hafoin fó lisensa operasaun, Diretór Downstream ne’e salienta ANPM nafatin hala’o inspesaun kada tinan dala ida depende ba indísiu ne’ebé iha atu husu hadi’a.

ANPM fó lisensa operasaun ne’e kada postu abastesimentu kombustivel sira tenke selu taxa tuir kapasidade operasaun ho mínimu kada tinan selu $1.200 ba leten.

Postu abastesimentu kombustivel 17 ne’e iha área operasaun hanesan munisípiu Dili, Lautem, Viquque, Aileu, Ermera no Liquiçá.

Postu Abastesimentu sira ne’ebé hetan lisensa operasaun kompostu husi iha Munisípiu Dili hanesan, Mãe da Graça iha Raikotu no Mãe da Graça iha Bebonuk, Super Fuel, Mega Petroleum, Culuhun Fuel Station, De Shun Fuel Station, Chong Ti, 68 Petroleum, 99 Petroleum, Lafaek Oil and Gas, Esperansa Timor Oan (ETO), Belak G & C Unipesoál, Lda. Munisípiu Liquiçá mak Alexa, iha Viqueque mak Jesoria, Emera mak Repende, Munisípiu Lautem, Mosalaki fuel, Aileu mak Miglen Fuel.

Notísia relevante : ANPM Rekolla Taxa Husi Postu Abastesimentu Kombustivel Rihun $100-Resin

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here