Foto Facebok/Perreira Ernesto.

DILI, 18 dezembru 2019 (TATOLI) – Prezidente Komisaun E Parlamentu Nasionál (PN) ne’ebé trata asuntu infraestrutura, komunikasaun ho telekomunikasaun, Abel Pires, hateten lider nasionál, Kay Rala Xanana Gusmão, nia asaun lori bee hodi fó rusa iha Jaco, hatudu ezemplu di’ak no husu ministériu relevante refleta asaun refere tanba la halo atu iha momentu emerjénsia.

“Nia hatudu ezemplu di’ak, halo ministériu relevante sira moe, se bele ita hotu halo reflesaun ba maun-boot nia domin ba ita-nia rain hodi banati tuir”, Abel Pires ba Ajénsia TATOLI iha PN, ohin.

Tanba ne’e, kabe ba ministériu barak nia responsabilidade, hanesan Ministériu Agrikultura no Peska, Ministériu Turizmu, Komérsiu no Ambiente, Sekretáru Estadu Ambiente no seluk tan, maibé realidade la hatudu ezemplu ne’ebé Xanana halo iha momentu rusa sofre bee no balun tenke mate.

Prezidente Komisaun E Parlamentu Nasionál (PN), Abel Pires Imajen/Tatoli Egas Cristovao.

“Situasan iha ne’ebá liga mós ba ambiente, balada-fuik, infraestrutura, turizmu, agrikultura no floresta, tuir loloos sira koordena oinsá ministériu relevante bele hola asaun imediatamente”, dehan.

Espera katak tinan oin ministériu relevante sira antesipa di’ak liután, maski tinan ne’e la konsege halo di’ak, maibé tenke estuda intervensaun hosi komunidade no Xanana nian.

“Loloos ita tenke haree intervensaun rápidu no koordenadu, finalmente buat ne’e la akontese, maski Jaco poténsia tebes atu dada turista sira no futuru sai fonte rendimentu ida”, preokupa.

Nia dehan asaun ne’e tuir loloos fanu ema hotu atu hala’o kna’ar, ida ne’e mós teste ida oinsá ministériu sira bele koordena malu didi’ak atu resonde situasaun iha Jaco.

Ministériu dehan osan laiha atu hola bee, nia hatán iha dalan barak atu bá Jaco, bele husu apoiu ba parseiru dezenvolvimentu sira, bele organiza malu lori bee bá Jaco hodi salva balada sira.

“Iha dalan barak bá Roma, signifika iha dalan barak lori bee bá Jaco, ha’u la fiar katak osan laiha ita atu tuur de’it, dalan barak ne’e maka maun-boot Xanana halo inklui komunidade sira”, katak.

Nune’e, realidade iha Jaco, iha ne’ebá kondisaun bee susar ba rusa atu hemu, hanesan reprezentante povu lamenta tebes, tanba loloos tenke antesipa atu rusa labele sofre ba bee.

Foin lalais, Lider Nasionál Kay Rala Xanana Gusmão, lori bee litru 320 bá Tutuala, Valu-Sere hodi fó hemu ba rusa hirak ne’ebé iha Illa Jaco tanba bailoro naruk.

Nune’e mós Xanana oferese bidón tomak iha lima, bidón ne’ebé fera ba rua hodi tau bee iha 20, jerigen iha 10, profíl kinur rua, mangeira rolu tolu no balde 10.

Notísia relevante : Hadomi Balada Sira : Xanana Lori Bee Litru 320 Ba Rusa iha Illa Jaco

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here