Ministru Estadu Prezidénsia Konsellu Ministru, Hermenegildo Augusto Cabral Pereira. Imajen dok.TATOLI

DILI, 18 dezembru 2019 (TATOLI)–Tuir Planu, aban, 19 dezembru, VIII Governu Konstitusionál sei lori hikas proposta orsamentu jerál Estadu (OJE) tinan 2020 ba Perlamentu Nasionál (PN). 

Ministru Estadu no Ministru Prezidénsia Konsellu Ministru, Hermenegildo Augusto Cabral Perreira hato’o asuntu ne’e, hafoin reuniaun Konsellu Ministru iha Palásiu Governu, Dili, ohin.

“Aban dadeer tuku 10:00 otl, sei iha Reuniaun Konsellu Ministru Estraórdináriu, atu aprova orsamentu jerál Estadu (OJE) 2020. Hafoin aprovasaun, Governu sei hatuun kedas ba Parlamentu Nasionál iha aban duni, nune’e PN bele konsidera no halo kalendarizasaun”, Agio esplika.

Agio hateten, aban hafoin reuniaun Konsellu Ministru, mak sei hetan esplikasaun másima husi Ministra Finansa Interina, Sara Lobo Brites, kona-ba redusaun ba OJE ne’e rasik.

Antes ne’e, Governu aprezenta ona proposta OJE 2020 ho montante biliaun $1.95 ba PN, iha 16 outubru tinan ne’e, no Parlamentu halo ona kalendarizasaun ne’ebé tuir loloos tama ona ba diskusaun jeneralidade iha 25 novembru, maibé tenke adia tanba iha loron ne’e Prezidente Partidu União Democrática Timorense (UDT), Deputadu Gilman Assunção Exposto dos Santos hakotu iis.

Iha loron 26 novembru, PN la konsege halo diskusaun, tanba desizaun husi reuniaun líder bankada sira deside katak iha loron ne’e deputadu sira partisipa iha serimónia fúnebre mate isin deputadu Gilman Exposto no mós preparasaun ba komemorasaun loron Proklamasaun Independénsia 28 Novembru.

Nune’e, iha 2 dezembru konsege duni halo debate ba jeneralidade, maibé iha loron 3 fulan ne’e, Governu deside dada hikas (retira) OJE husi PN, tanba proposta mai husi deputadu sira ne’ebé konsidera OJE la prenxe estrutura, legál, konstitusionál no formál.

Governu mós komprometidu atu aprezenta hikas iha loron 13 fulan ne’e, maibé la konsege nafatin tanba Governu rasik husu tan tempu to’o loron 19 fulan nee, hodi reajusta hikas orsamentu ne’e, no ohin Governu deklara katak aban sei lori duni proposta OJE 2020 ba Parlamentu Nasionál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here