Kondisaun hela fatin balun hamutuk 100-resin ahi han mutuk iha Antiga Merkadu Comoro, Dili 9 desembru 2019. Imajen/Antonio Goncalves

DILI, 17 dezembru 2019 (TATOLI) – Vítima inséndiu iha aldeia 03 Antigu Merkadu Comoro, suku Fatuhada, postu administrativu Dom Aleixo, munisípiu Dili, ho inisiativa rasik hahú halo konstrusaun ba uma ne’ebé antes ne’e ahi han iha loron 9 dezembru.

Vítima Anselmo Gusmão, hateten haree ba tempu udan ne’ebé besik ona, vítima sira organiza malu hodi servisu hamutuk harii uma atu bele hamahan-aan husi loron manas no udan.

“Maioria uma hirak ne’ebé ahi han, la salva buat ida inklui osan, balun halai sai husi uma ho roupa iha isin nian de’it. Tanba ne’e, agora balun seidauk bele harii uma tanba osan mak laiha duni. Maibé atu dehan katak, husi maioria ne’ebé ahi han, oras ne’e na’in-20 resin mak seidauk harii uma tanba osan laiha duni. Ami sira seluk ne’ebé iha osan oituan komesa harii ona”, tenik Anselmo ba Agência Tatoli, tersa ne’e.

Maski nune’e, lori vítima sira nia naran, Anselmo agradese ba Prezidénsia Repúblika, Francisco Guterres Lú Olo no mós Governu liuhosi Ministériu Solidariedade Sosiál no Inkluzaun (MSSI) no mós instituisaun relevante sira ne’ebé oferese ona sasan nesesidade bázika, inklui fós sasan uma laran nian.

“Hakarak ka lakohi ami tenke haka’as-aan atu harii ho kbiit ne’ebé iha tanba agora atu husu ba sé? Hakarak husu ba Estadu, maibé realidade agora osan laiha. Tanba ne’e, hakarak agradese ba Estadu ne’ebé oferese ona fós no sasan nesesidade bázika nian tanba ahi han hotu “, nia agradese.

Nune’e mós, Vítima Gonçalo da Costa, hateten iha semana ida nia laran konsege harii uma lubuk ida tanba serbisu hamutuk entre vítima sira.

“Ami iha ne’e hotu hamriik kaer serbisu tanba ita haree agora udan mós tun daudaun ona, ami nia oan-sira atu lori ba ne’ebé? iha ne’e mós maioria labarik, feto, inklui inan isin rua”, nia akresenta.

Kona-ba família hirak ne’ebé seidauk harii uma, nia dehan oras ne’e sei hela ho família no balun dada lona.

Iha fatin hanesan, Xefe Suku Fatuhada Marcelino Soares, louva ho inisitiva vítima ne’ebé haka’as-aan ho kbiit rasik hodi konstrui hela fatin perante situasaun ne’e.

“Ha’u louva ita boot sira tanba iha inisiativa rasik hodi Harii imi nia uma. Ita presiza mak ida-ne’e duni no labele hein. Ita bele husu ba Estadu atu tau matan hodi ajuda ita maibé ita mós tenke iha inisiativa atu responsabiliza ita nia moris rasik. Hanesan sidadaun di’ak labele hein de’it ajudu husi Estadu maibé tenke hamriik iha ain rasik “, hateten Marcelino.

Maski nune’e, hanesan autoridade lokál, Marcelino promete sei la husik ninia povu ne’e moris iha terus nia laran maibé sei buka meiu oioin hodi ko’alia ho Governu atu tau matan ba vítima inséndiu Comoro.

Entretantu, inséndiu ne’ebé akontese iha loron 9 fulan ne’e, rezulta uma 91 mak ahi han to’o mutuk, inklui dokumentu importante sira.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here