Reprezentante Sekretáriu Estadu Komunikasaun Sosiál hala'o konferénsia imprensa hodi esklarese kona-ba dekretu lei apoiu orsamentu ba mídia ne'ebé Prezidente Repúblika veta. Imajen Mídia SEKOMS

DILI, 17 dezembru 2019 (TATOLI)–Sekretaria Estadu Komunikasaun Sosiál (SEKOMS) prevee orsamentu hamutuk rihun $280 atu apoiu ba mídia privadu sira iha Timor-Leste maibé la konsege realiza tanba Prezidente Repúblika, Francisco Guterres Lú Olo, veta ona Dekretu Lei Rejime hosi Estadu apoiu órgaun komunikasaun sosiál.

Tuir komunikadu imprensa ne’ebé Agência Tatoli asesu hosi Mídia SEKOMS, ohin, esplika, Prezidente Repúblika uza nia kompeténsia hodi veta politika tuir konstituisaun RDTL artigu 85 alínea C.

Komunikadu haktuir, dekretu lei ne’ebé Prezidente Repúblika veto antes ne’e aprova ona hosi Konsellu Ministru iha 6 novembru liubá.

Entretantu, asesór jurídiku SEKOMS, José da Conceição informa dekretu ne’e fó apoiu ba mídia sira-ne’ebé hala’o sira-nia atividade liga ba komunikasaun sosiál liuliu jornál imprime ne’ebé atu lori konteúdu ba komunidade. Ida-ne’e mak Governu hanoin katak atu fó apoiu.

Nia subliña, iha pontu segundu veto Prezidente Repúblika nian ne’e ho razaun atu nune’e mídia sira labele dependénsia ba Governu.

“Maibé ida-ne’e la’ós hanesan ne’e. Tuir Governu nia pontu devista oinsá mak bele haforsa mídia sira hodi bele haklaken informasaun ba komunidade,” José esplika.

Entretantu, iha pontu terseiru ne’ebé sai razaun ba Prezidente Repúblika hodi veto dekretu refere katak bainhira fó apoiu ba meídia hirak-ne’e mak sei hatodan orsamentu jerál Estadu kada tinan.

SEKOMS kria dekretu lei refere bazeia ba Lei Komunikasaun Sosiál artigu 6 ne’ebé fó dalan ba Estadu atu tulun mídia privadu sira.

Veto Prezidente Repúblika nian ne’e sei haruka hikas ba Governu liuliu SEKOMS atu haree no hadi’a filafali dekretu ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here