Koordenadór AIFAESA, Abílio Oliveira Sereno. Imajen Tatoli/Egas Cristovão

DILI, 17 dezembru 2019 (TATOLI) – Koordenadór Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), Abílio Oliveira Sereno, hateten rejime kontrolu tabaku ho númeru 14/2009 ne’e la’ós de’it vale ba vendedór sira, maibé mós ba fumadór.

“Hakarak hateten rejime ne’e la’ós ko’alia de’it negosiante sira ne’ebé maka fa’an, más ko’alia mós oinsá fumadór sira tenke komporta tuir rejime jurídiku ne’e, ne’ebé atu fuma karik tenke haree didi’ak fatin, labele fuma iha fatin públiku, bainhira sa’e transporte públiku”, Koordenadór AIFAESA afirma bainhira hamutuk ho Aliansa Nasionál Kontrola Tabaku Timor-Leste (ANCT-TL, sigla portugés) realiza semináriu ida ho tema “Vendedór tabaku kumpre rejime kontrolu tabaku” ne’ebé partisipa hosi Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, iha salaun Ministériu Solidariedade Sosiál no Inkluzaun (MSSI), Kaikoli, ohin.

Abílio dehan sosializasaun ba rejime kontrolu tabaku, antes ne’e, AIFAESA hala’o tiha ona iha munisípiu sira, liuhosi fahe broxura ne’ebé hakerek ho lian Tetun, Inglés no Portugés. “Maibé liuhusi semináriu ne’e mós bele kompleta tan buat seluk ne’ebé ami halo tiha ona. Iha tinan 2020, ami-nia asaun preventiva sei makaas”, Abílio katak.

Objetivu hosi rejime kontrolu tabaku ne’e maka atu evita moras sira ne’ebé mai hosi konsume tabaku no kontrola produtu sira tabaku nian.

Aleinde proibisaun sira seluk kona-ba konsumu tabaku iha fatin sira ne’ebé determinadu, ezemplu iha fatin públiku fexadu, servisu fatin, transporte públiku, agora, produtu sira tabaku nian tenke kumpre ho proibisaun no kondisaun foun sira ne’ebé aplikavel.

Produtór, importadór, distribuidór no fa’an-na’in sira ne’ebé la kumpre regra sira sei hetan sansaun no selu koima.

Iha rejime númeru 14/2009 ne’e, iha mós kompozisaun no substánsia sira ne’ebé kontein iha produtu sira tabaku nian. Produtu sira tabaku nian ne’ebé prodús ka fa’an iha Timor-Leste maka, sigarru lolon ida labele kontein alkatraun liu miligrama 10, labele kontein nikotina liu miligrama 1, no sigarru lolon ida labele kontein monóksidu karbonu liu miligrama 10.

Embalajen kona-ba produtu sira tabaku nian hanesan; informasaun kona-ba konteúdu alkatraun, nikotina no monóksidu karbonu tenke imprime ho letra ne’ebé iha kór kontra ho kór baze, iha kada masu sigarru nia sorin (lolon) ki’ik, informasaun tenke hakerek iha lian Tetun ka Portugés. Hosi kada masu sigarru no husi kada slop sigarru (masu esteriór) tenke tau ida-idak nia númeru lote ka ekivalente, hodi nune’e bele halo identifikasaun ba fatin no data produsaun nian.

Iha rejime ne’e  mós iha mensajen proibida sira hanesan; labele uza iha masu sigarru produtu tabaku ho testu, kór figura, naran, marka no símbolu figurativu ka sinál sira seluk ne’ebé halo sensasaun katak produtu balu ladún iha prejuízu kompara ho produtu sira seluk, ka tradusaun má vokábulu ekivalente sira, nune’e mós kualkér tipu grafízmu ne’ebé iha relasaun ho tabaku ka ho intensaun halo relasaun ho deskrisaun sira refere, ezemplu kona-ba testu proibidu sira ‘kmaan, kmaan tebetebes, natoon, ladún todan, no elegante’. Mensajen ikus liu maka la permite mensajen sira iha embalajen produtu tabaku nian ne’ebé enkoraja ka insentiva konsumu produtu tabaku.

Iha rejime ne’e bandu hodi fa’an produtu tabaku ba labarik sira ho tinan 17 mai kraik, fa’an-na’in sira tenke ezije atu hatudu dokumentu nian bainhira de’it iha dúvida kona-ba idade sosa-na’in nian. Karik sosa-na’in lakohi hatudu dokumentu, fa’an-na’in labele fa’an produtu ba nia, labarik sira ho tinan 17 mai kraik bandu atu fa’an produtu tabaku.

Bandu mós atu fa’an embalajen promosionál produtu tabaku. Bandu fa’an de’it sigarru iha masu, ne’ebé kontein pelumenus sigarru lolon 20, bandu atu fa’an kada sigarru lolon, no bandu atu fa’an produtu tabaku iha fatin sira hanesan; iha fatin sira ne’ebé fó kuidadu ba saúde (ospitál, klínika, sentru saúde, konsultóriu médiku, postu sokorru, laboratóriu, farmásia no fatin sira ne’ebé fornese ai-moruk la sujeita ba reseita médika).

Iha fatin sira ba idozu no ema ho defisiénsia sira, sentru komunitáriu, ofisina traballu protejidu, sentru reabilitasaun no unidade apoiu ba toxikodependente no alkóliku sira.

Iha fatin sira destina ba labarik menór sira hanesan; infantáriu, krexe no fatin sira seluk ba asisténsia infantíĺ, fatin ba infánsia no foin-sa’e, sentru ba okupasaun tempu livre, kampu ba féria no fatin similár sira.

Iha fatin ensinu primáriu no sekundáriu, fatin ensinu superiór, sentru formasaun profisionál no fatin desportu nian. Iha fatin sira iha ne’ebé instala órgaun lejizlativu no judisiál, nune’e mós servisu no órgaun administrasaun públika.

Iha kantina no refeitóriu entidade públika no privada sira iha ne’ebé maka uza de’it ba ema hira ne’e. Iha fatin sira iha ne’ebé esplora mákina diversaun, video jogu, jogu biliár no bowling, no iha siber kafé sira.

Liuhusi dalan ne’ebé maka bele iha asesu diretamente ba sosa-na’in, ezemplu; liuhusi mákina automátika no espozitór sira. Liuhusi dalan sira seluk ne’ebé la permite fa’an-na’in identifika sosa-na’in sira-nia tinan, ezemplu internét ka korreiu postál.

Iha rejime ne’e mós hateten katak sei aplika koima husi US$ 70 to’o US$500 bainhira fa’an produtu tabaku iha fatin sira ne’ebé temi ona, fa’an produtu tabaku liuhusi dalan ne’ebé  maka bele iha asesu diretamente ba sosa-na’in, ezemplu liuhusi mákina automátika no espozitór sira. Fa’an produtu tabaku liuhusi televenda ka liuhusi internét ka korreiu postál, fa’an embalajen promosionál ba produtu tabaku.

Sei aplika koima hosi US$70 to’o US$1,000 bainhira fa’an produtu tabaku ne’ebé la tuir rekizitu sira embalajen nian ne’ebé temin ona, fa’an produtu tabaku ba, ka husi, labarik ho tinan 17 mai kraik.

Sei aplika koima husi US$100 to’o US$5,009 bainhira fa’an sigarru eletrónika, fa’an masu sigarru ne’ebé la kontein pelumenus sigarru lolon 20 ka fa’an sigarru lolon, no viola proibisaun kona-ba publisidade, promosaun no patrosíniu nian.

Produtór importadór, distribuidór, no grosista sira ne’ebé la respeita konteúdu másima nikotina, monóksidu karbonu no alkatraun, rekizitu embalajen, regra kona-ba fa’an produtu tabaku, ka proibisaun kona-ba publisidade, promosaun no patrosíniu, sei sujeita ba koima husi US$500 to’o US$10,000.

Tuir Abílio katak asaun preventiva ne’ebé AIFAESA n sei halo iha tinan oin, aleinde envolve ANCT-TL, sei involve mós xefe suku sira, eskola sira hahú hosi eskola primária, sekundária to’o ensinu superior sira para redús fuma tabaku.

Kona-ba sigarru ilísitu kontinua fa’an, Koordenadór ne’e dehan tanba sira la haree, no bainhira simu informasaun no tun direta ba terrenu labele hetan tanba loja na’in sira subar.

Maibé Abílio dehan, kuandu ekipa AIFAESA hetan maka sei aplika sansaun rigoroza tuir regulamentu ne’ebé estabelese ona.

Notísia relevante : Nasaun atu Bá Oin Populasaun Tenke Saudavel

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here