Prezidente Tribunal Rekursu, Deolindo dos Santos. Imajen Tatoli/Antonio Goncalves.

DILI, 17 dezembru 2019 (TATOLI)–Prezidente Tribunál Rekursu (TR), Deolindo dos Santos, tersa ne’e, hala’o soru-mutuk ho Primeiru-Ministru, Taur Matan Ruak, hodi hato’o pedidu husu Governu nomea hikas membru Konsellu Superiór Majistratura Judisiária (KSMJ) foun hodi troka membru tuan sira.

“Ita iha membru Konsellu Superiór Majistratura Judisiáriu. Entaun, ohin, ha’u mai hasoru Primeiru-Ministru hodi hato’o pedidu ba Governu para nomea fali membru foun atu bele haree serbisu sira ho di’ak ba oin. Membru Konsellu Diretivu, Cirilo Cristóvão fila ona ba mundu seluk entaun presiza fali substituisaun,” Deolindo informa iha Palácio do Governo.

Entretantu, parte rua diskute mós kona-ba oinsá atu konstrui obra foun ba Tribunál Distritál Dili nian ne’ebé sei hala’o iha tempu besik.

“Ha’u mós ko’alia ho Primeiru-Ministru kona-ba oinsá atu hahú obra ba Tribunál Distritál Dili ninian. Ita iha ona kontratu ho kompañia ne’ebé manán atu halo obra ne’e. Ita mós asina ona kontratu ho kompañia ne’ebé halo supervizaun ba projetu ne’e rasik. Entaun, iha tempu badak obra ne’e hahú ona,” ema númeru ida iha Tribunál ne’e haklaken.

Obra refere sei konstrui ho orsamentu montante millaun $10 resin.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here