Dosente Ekonomia Universidade da Paz (UNPAZ), Alexandre de Sousa. Imajen/Tatoli Florencio Ximenes.

DILI, 17 dezembru 2019 (TATOLI) – Ekonomista sira husi Institute of Business (IOB) no Universidade da Paz (UNPAZ) konsidera diskusaun no aprovasaun Orsamentu Jerál Estadu  (OJE) 2020 tarde, sei afeta ba roda ekonomia iha rai-laran.

“Ita hasoru hela situasaun ne’ebé Governu retira proposta OJE 2020 ne’ebé aprezentasaun no aprovasaun tarde afeta tebes ekonomia rai-laran”, Xefe Departamentu Ekonomia no Dezenvolvimentu IOB, Juviano Xavier, ba Ajénsia TATOLI iha INFORDEPE-Balidi, ohin.

Xefe Departementu ne’e friza kuaze benefisiáriu sira ba OJE hanesan idozu, bolsa da mãe, martir, no veteranu hatudu katak roda ekonomia Timor-Leste ne’e depende ba despeza Estadu.

Governu retira proposta orsamentu Jerál Estadu 2020, ho razaun númeru boot
signifika katak Governu ladún iha konsisténsia no seriedade ba orsamentu Estadu.

“Ita hotu hatene katak hahú ita-nia independénsia to’o agora, ekonomia Timor-Leste depende ba setór públiku katak roda ekonomia rai-laran ne’e sei depende de’it ba orsamentu Estadu kada tinan, ne’ebé ekonomia rai-laran ne’e sukat husi orsamentu Estadu”, katak.

Nia dehan despeza Estadu iha mak foin bele asegura rendimentu no podér kompras nian iha merkadu liuliu hasa’e kreximentu ekonómiku

Enkuantu to’o agora, orsamentu seidauk debate ne’e sei afeta, dahuluk, risku podér kompras iha merkadu menus, produsaun iha setór umakain no setór empreza mós sei tun.

“Tanba ita hotu hatene katak durante ne’e setór privadu sira depende de’it ba orsamentu Estadu nian ne’ebé maioria foti Fundu Petrolíferu”, adianta.

Sobre orsamentu duodesimál, akadémiku ne’e la konkorda totál orsamentu duodésimu tanba situasaun emerjénsia ida no lakohi nasaun nia vida la’o ho emerjénsia de’it.

“Ita uluk uza ona orsamentu duodesimál, maibé haree saida mak akontese, orsamentu ne’e atu halo moris de’it mákina administrasaun Estadu nian, maibé la garante dezenvolvimentu ekonomia liuliu setór vital sira ne’ebé Governu hanoin atu investe”, preokupa.

“Ita haree orsamentu duodesimál ne’e la fó benefísiu ba komunidade, maibé só ba instituisaun públika mak hetan benefísiu husi osan duodesimál ne’e”, informa.

Atu solusiona situasaun ne’e, Xefe Departamentu ne’e husu tenke hakotu korrente konflitu iha nivel altu ka instabilidade polítika entre liuliu lider partidu polítiku sira.

Aleinde ne’e, nia husu mós tenke hakotu mós impase polítika liuliu ba membru Governu inkompletu atu ezekuta OJE 2020 ho kualidade hodi benefisia povu.

Oitavu Governu mós tenke hatudu boa jestaun liuliu hadi’a kapasidade membru Governu, espesífiku haree ema nia kapasidade no intelektuál hodi tuir nia área atu ezekuta orsamentu ho rezultadu ne’ebé di’ak ba povu no nasaun.

Iha fatin hanesan, Dosente Ekonomia Universidade ba Pás (UNPAZ), Alexandre de Sousa, dehan orsamentu Estadu mak sai sombriña ba dezenvolvimentu ekonomia iha rai-laran ne’ebé OJE 2020 mak aprova tarde sei implika ba ekonomia nasaun.

“Orsamentu Jerál Estadu 2020 mak aprova tarde iha tinan ne’e, sei sai problema ba iha setór hotu-hotu liuliu ekonomia, sosiál no polítika”, katak.

Nune’e sei afeta makaas liuliu projetu la la’o no populasaun la hetan sirkulasaun orsamentu tanba Governu ezekuta orsamentu mak foin iha sirkulasaun hodi povu hetan benefísiu. “Ita-nia povu la hetan sirkulasaun orsamentu ne’e atu moris halo oinsá?”, haktenik.

Atu rezolve kestaun ne’e tenke hametin unidade nasionál iha aspetu hotu-hotu atu OJE 2020 bele aprova hodi dezenvolve nasaun ne’e hodi fó moris di’ak ba povu. “Ami kontinua husu lider nasionál sira tenke hanoin ida de’it no simu malu hodi tau iha planu asaun atu dezenvolve nasaun ne’e”, sujere.

Entretantu, Governu liuhusi Primeiru-Ministru Taur Matan Ruak deside retira proposta lei Orsamentu Jerál Estadu 2020 iha Parlamentu Nasionál iha debate jeneralidade nian ba loron daruak no promete aprezenta fali iha 13 dezembru, maibé daudaun muda fali ba 19 dezembru tanba Governu sei armoniza ka halo ajustamentu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here