Konselleru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar. Imajen Tatoli/Eugénio Pereira.

DILI, 17 dezembru 2019 (TATOLI) – Konselleru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori ‘Bucar’, marka prezensa iha Palásiu Governu hodi hasoru malu ho Primeiru-Ministu (PM), Taur Matan Ruak.

Objektivu hosi enkontru ne’e hodi hatudu ba públiku katak koligasaun partidária Aliansa Mudansa ba Progresu (AMP) partidu CNRT, PLP no KHUNTO, sei nafatin sólidu hodi lori Governu ba oin.

“Ohin ha’u mai hasoru Primeiru-Ministru ne’e hodi hatudu ba públiku katak ami sei sólidu hodi serbisu hamutuk ba oin. Buat ne’ebé hatudu iha Facebook ne’e laloos, tanba ami ida de’it hamutuk ba oin”, dehan Naimori, tersa ne’e.

Nune’e, nia mós hato’o parabéns ba Xefe Governu tanba bele atende problema hotu ho di’ak iha governasaun maski servisu balun seidauk iha solusaun.

Naimori subliña, iha sorumutuk ne’e la ko’alia kona-ba remodelasaun maibé karik kuandu mosu remodelasaun, kompténsia tomak PM Taur mak sei desidi.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here