Mestre Pe. Júlio Crispim, Drs, MDPri JURISTA no AKADEMISTA. Imajen Cipriano Colo

Mestre Pe. Júlio Crispim, Drs, MDPri

JURISTA no AKADEMISTA

INTRODUSAUN

Governu hahú prosesu elabora Orsamentu Jerál Estadu (OJE) to’o nia aprovasaun iha Konsellu Ministru (KM), tuir nia dalan ka prosesu rasik (ho naran: Yellow Road ka dalan kinur) ne’ebé bele hahú molok to’o tinan klaran. Tuir Lei Orsamentu no Jestaun Finanseira (Lei OJF) nu’udar Lei substantiva (Lei materiál) haruka Governu tenke aprezenta OJE ba PN to’o loron 15 Outubru tinan-tinan  (art. 30.º, n.º 1) ho esepsaun tolu, mak: 1) Governu em funsaun demitidu ka hetan demisaun; 2) Governu foun toma posse; 3) Legislatura remata (art. 30.º, n.º 2), nune’e mos tuir Rejimentu Parlamentu Nasionál (Rejimentu PN) nu’udar Lei adjetiva (Lei formál) haruka Governu tenke aprezenta OJE ba PN to’o loron 15 Outubru tinan-tinan (art. 162.º).

Aprovadu iha KM, OJE nu’udar proposta Lei, Governu haruka ba PN iha loron 15 Outubru tuir Lei OJF (art. 30.º) no tuir Rejimentu PN (art. 162.º), katak loron ne’e nu’udar LIMITE LEGÁL (limite materiál) no LIMTE REJIMENTÁL (limite formál) ba Governu atu aprezenta OJE ba PN. Liu PRAZU LEGÁL no REJIMENTÁL ne’e, implika ILEGALIDADE materiál no formál ho razaun CADUCIDADE no la prodús kualker efeitu jurídiku .

PN simu tiha OJE nu’udar proposta Lei iha PRAZU loron 60 [art. 86.º al. f)] nu’udar LIMITE KONSTITUSIONÁL atu halo apresiasaun, debate no aprovasaun ba proposta Lei OJE hodi aprova iha PN nu’udar Dekretu-Lei OJE. Liu PRAZU KONSTITUSIONÁL ne’e, implika INKONSTITUSIONALIDADE formál no materiál ho razaun CADUCIDADE no la prodús kualker efeitu jurídiku .

Aprovadu ona iha PN, sei haruka ba PR atu promulga ka veta iha loron 30 (art. 88.º, n.º 1). Mak PR veta, haruka fila ba PN hodi konfirma voto iha loron 90 laran (art. 88.º, n.º 2, 1.ª parte), bainhira konfirmadu iha iha PN, haruka fila ba PR tenke promulga iha loron 8 nia laran hosi PR (art. 88.º, n.º 2, 2.ª parte). Liu PRAZU ne’e, implika INKONSTITUSIONALIDADE formál no materiál ho razaun CADUCIDADE no la prodús kualker efeitu jurídiku .

  1. FAKTU OJE 2020 (Retira no atu Reentrega OJE 2020)

Na realidade, relasiona ho OJE 2020, bele dehan VIII GK (Governu Konstitusionál) kumpre duni loron ne’ebé prevee iha Lei GF (art. 30.º) no konsidera kumpre mos data ne’ebé prevee Rejimentu PN (art. 162.º), maske atraza loron ida, tanba Governu ENTREGA iha loron 16 fulan Outubru tinan 2019, sei bele justifika ho prinsípiu razoabilidade no solidariedade institusionál. Nune’e mos, juridikamente sei bele kualifika nafatin nu’udar mora iha kumprimentu obrigasaun LEGÁL.

Maske nune’e, prosesu aprovasaun ba jeneralidade la’o dadaun hela tuir Rejimentu PN, VIII GK RETIRA OJE 2020 (retira nu’udar proposta lei ida tuir Rejimentu PN) iha loron 3 fulan Dezembru, hodi promente mos sei REENTREGA fali iha loron 13 Dezembru (maibé muda tan ona ba loron 19 Dezembru, ne’ebé iha loron ne’e sei hatama fali ka lae, hotu-hotu tau nafatin konfiansa ba VIII Governu).

Faktu Governu retira OJE 2020 nu’udar proposta Lei, hosi Plenária PN prevee iha Rejimentu PN, maibé la prevee iha Lei GF no la prevee mos iha KRDTL (Konstituisaun Repúblika Demokrátika Timor-Leste. Enkuantu, faktu atu Governu reentrega fali OJE 2020 ba PN, la prevee iha Rejimentu PN, la prevee iha Lei GF no la Prevee iha KRDTL. Tuir deklarasaun hosi señor Prezidente PN, katak OJE 2020 sei reentrega fali nu’udar proposta lei foun ba PN hosi VIII Governu nia reelaborasaun.

Kona ba asuntu ne’e, hosi pontu de vista RPN nu’udar Lei prosesuál ka adjetiva (Formál), iha PN, la iha problema, tanba PN iha nia prosesu aprovasaun OJE nu’udar proposta lei tenke aplika Rejimentu PN konjuga ho KRDTL, maibé hosi pontu  vista Lei OJF nu’udar Lei substantiva (Materiál), iha Governu, iha ona problema, tanba Governu iha nia elaborasaun ka reelaborasaun OJE tenke aplika Lei OJF konjuga ho KRDTL. Governu la bele uza fali Rejimentu PN (Lei adjektivu ka formál) hodi halo elaborasaun ka reelaborasaun ba OJE 2020 nu’udar proposta lei, maibé Governu tenke uza Lei OJF (Lei substantivu ka materiál) hodi halo elaborasaun ka reelaborasaun ba OJE 2020 nu’udar mandatu LEGÁL ka KONSTITUSIONÁL ida.

  1. DIREITU OJE 2020 (PRAZU LEGÁL no PRAZU KONSTITUSIONÁL OJE 2020)

Juridikamente, foti problema relasiona ho PRAZU LEGÁL no PRAZU REJIMENTÁL ligadu ba PRAZU KONSTITUSIONÁL. Katak, bainhira PRAZU LEGÁL no PRAZU REJIMENTÁL konjuga ho PRAZU KONSTITUSIONÁL, bele dehan, PN hahú halo servisu hahú hosi loron 15 Outubru (art. 30.º Lei OJF no art. 162.º RPN), durante loron 60 [art. 86.º, al. f) 5ª parte KRDTL] hodi remata, PN nia servisu ba OJE, iha loron 15 Dezembru.

Iha loron 60 [art. 86.º, al. f) 5ª parte KRDTL] ne’e nia laran, PN sei hala’o nia knaar tuir RPN (Rejimentu Parlamentu Nasionál) haruka, katak Prezidente PN, simu tiha OJE hosi Governu, tenke hatun kedas ba Komisaun Espesializada Permanente (KEP) hodi hala’o nia servisu iha loron 15 nia laran sura hosi loron admisaun nian (art. 164.º, n.º 1 RPN), depois KEP haruka ho nia pareser ba Komisaun Ekonomia no Finansa (KEF) hodi hala’o nia servisu durante loron 20 nia laran (art. 164.º, n.º 2 RPN) hodi bele aprezenta nia relatóriu iha debate jeneralidade durante loron 3 nia laran (art. 166.º, n.º 1 RPN) atu bele hetan aprovasaun ba nia jeneralidade hosi plenária PN; hosi ne’e mak bele hakat ba debate espesialidade hodi hetan mos nia aprovasaun, la liu loron 10 (art. 167.º, n.º 1 RPN) iha plenária PN. Ikus liu, mak iha plenária PN halo aprovasaun Finál no Globál ba OJE em kauza. Em síntese, hosi loron admisaun OJE iha PN to’o nia aprovasaun bele soma hamutuk: loron 15+loron 20+loron 3+loron 10 = loron 48 (máximo bele sura loron 50, katak loron 60 ne’ebé KRDTL prevee nu’udar PRAZU KONSTITUSIONÁL ba OJE sei iha resin loron 10.

Nune’e, iha loron 60 nia laran ne’e, OJE tenke hetan aprovasaun iha PN, mak la hetan aprovasaun iha loron 60 nia laran, KRDTL kualifika nu’udar “grave krise instituisionál” [art. 86.º, al. f) 2.ª parte], konsekuentemente PR, rona tiha Partidu Polítiku (PP) sira iha PN no rona mos Konsellu Estadu (KE), PR bele dissolve PN [art. 86.º, al. f) 1.ª parte].

Kona ba OJE 2020, VIII GK ENTREGA iha loron 16 Outubru, maske atraza loron ida, maibé sei bele tolera tuir prinsípiu razoabilidade no solidariedade institusionál, tanba sei la fó prejuízu boot ba PRAZU prosesuál ka adjetivu (formál) tuir RPN no PRAZU substantivu (materiál) tuir Lei OJF no KRDTL.

Problema JURÍDIKA ligadu ba PRAZU mosu ba OJE 2020, hahú ho, VIII GK, RETIRA OJE 2020 (retira nu’udar proposta lei ida) iha loron 3 fulan Dezembru, bainhira debate jeneralidade la’o ona loron rua ona (RPN prevee debate jeneralidade ba loron 3 atu bele halo aprovasaun iha plenária PN). Problema ne’e mak,  bainhira OJE 2020 retira ona hosi PN, PRAZU ne’e sei sura nafatin hahú hosi loron 15 Outubru (katak durante reelaborasaun OJE 2020 ne’e PRAZU LEGÁL la’o nafatin) ka sura foun hahú fali hosi loron ne’ebé Governu atu REENTREGA fali (maske irrelevante, bele koalia de’it) OJE 2020 reelaboradu ba PN (tuir planu submete fali iha loron 13 Dezembru, maibé muda tan ona ba loron 19 Dezembru).

Konsekuénsia jurídika hosi PRAZU LEGÁL ba OJE 2020 ne’e mak: (1) loron 60 [art. 86.º, al. f) KRDTL] sura hosi loron 15 Outubru (limite LEGÁL no limite REJIMENTÁL), mak iha loron 15 Dezembru OJE 2020 tenke hetan aprovasaun hosi PN, mak OJE 2020 la hetan aprovasaun, iha PRAZU ne’e, KRDTL kualifika nu’udar “grave krize instituisionál” [art. 86.º, al. f) 2.ª parte], konsekuentemente PR, rona tiha PP sira iha PN no mos rona tiha Konsellu Estadu (KE), PR bele dissolve PN [art. 86.º, al. f) 1.ª parte]; (2) mak VIII GK REENTREGA fali OJE 2020 iha loron 19 Dezembru, bele kestiona nia baze LEGÁL, tanba viola Lei OJF no aplika sala RPN.

Dehan viola Lei OJF, tanba iha lei ne’e prevee mak loron 15 Outubru atu Governu entrega OJE ba PN, maibé Lei OJF ne’e la prevee kona ba Governu retira OJE hosi PN no mos la prevee atu Governu reentrega fali OJE ba PN.

Dehan aplika sala RPN, tanba maske RPN prevee kona ba Governu bele retira proposta Lei (art. 95.º, n.º 2 RPN), em konkretu OJE 2020, hanesan mos kanselamentu ida ba inisiativa lejislativa Governu nian ba OJE 2020, maibé retira ne’e mos implika nia renovasaun ba inisiativa lejislativa Governu rasik ba proposta lei retirada (em konkretu OJE 2020), katak konsideradu nu’udar proposta lei não votada iha sessão lejislativa ne’ebé la carece atu renova fali iha sesaun lejislativa tuir mai (art. 94.º, n.º 1 RPN). Signifika, Governu retira OJE 2020 hosi PN iha sesaun lejislativa 2019, Governu sei la bele hatama fali OJE 2020 ba PN iha sesaun lejislativa 2020, konsekuentemente Estadu sei la iha OJE 2020. Nune’e bele kualifika nu’udar “grave krize instituisionál” [art. 86.º, al. f) 2.ª parte], konsekuentemente PR, rona tiha PP sira iha PN no mos rona tiha Konsellu Estadu (KE), PR bele dissolve PN [art. 86.º, al. f) 1.ª parte]. 

  1. LEI ALTERASAUN DATA APREZENTASAUN OJE 2020

Mak VIII GK HATENE karik (atu Governu hatene oin aas, sé Assesór Jurídiku  sira, maske barbarak no seluk osan mesak boboot de’it, la ajuda didiak no la ajuda loloos VIII Governu ba kestaun jurídika OJE 2020), bele solisita ba PN atu aprova uluk lai Lei alterasaun data ba aprezentasaun OJE 2020, hanesan akontese ona iha 2010 ho Lei N.º 9/2010 de 13 de Outubru kona ba alterasaun data aprezentasaun OJE ba 2011 ne’ebé Governu altura ne’ebé aprezenta kedas ba PN iha fulan Setembru nia laran ho nia razaun própriu.

Ba Lei ida nune’e, VIII GK la halo, tanba iha hanoin katak prosesu aprovasaun OJE 2020 iha PN sei la’o tuir nia dalan no tuir nia tempu rasik. Tanba la halo Lei ne’e, mak hamosu kedas kestaun jurídika ba VIII Governu bainhira retira OJE 2020 hosi PN no atu reentrega fali OJE 2020 ba PN, katak VIII Governu lakon ona baze LEGÁL atu reentrega fali OJE 2020 ba PN iha data seluk ne’ebé la prevee iha lei ruma. Signifika, falta ona nia fundamentu LEGÁL, mak VIII Governu reentrega fali de’it iha data ruma la tuir lei, implika kedas ILEGALIGADE no la prodús kualker efeitu jurídiku . Ida ne’e, nia konsekuénsia loloos mak, titular Governu nian la kumpre konstituisaun no Lei (art. 2.º, n.º 2 KRDTL) no mos la kumpre juramentu investidura (art. 77.º, n.º 3 KRDTL) hodi la fó OJE 2020 ba Estadu RDTL.

KONKLUZAUN

Proposta lei OJE 2020 enfrenta kestaun PRAZU LEGÁL no PRAZU KONSTITUSIONÁL ne’ebé bele implika CADUCIDADE no la fó nia efeitu jurídiku  rasik. Ba ida ne’e, bele dehan dalan ba PR atu dissolve PN nakloke loos ona, tanba sura hosi loron 15 fulan Outubru, iha loron 60 laran, to’o loron 15 Dezembru, PN la aprova OJE 2020 KRDTL konsidera nu’udar “grave krize institusionál”, nune’e PR bele dissolve ona PN.

Governu entrega OJE 2020 ba PN iha loron 16 Outubru ne’e, bele atraza loron ida, maibé sei bele justifika ho prinsípiu razoabilidade no solidariedade institusionál. Kona-ba, Governu retira fali OJE 2020 hosi PN, maske prevee duni iha RPN nu’udar proposta Lei, maibé atu Governu reentrega fali ba PN, RPN la fó dalan ba data seluk. Enkuantu Lei OJF rasik nem prevee Governu bele retira OJE hosi PN, nem prevee Governu bele reentrega fali OJE ba PN iha data seluk. Hosi parte seluk, iha possibilidade atu halo Lei alterasaun data aprezentasaun OJE 2020, maibé VIII Governu la uza possibilidade ida ne’e. Ne’e mak problema LEGÁL no KONSTITUSIONÁL ne’ebé OJE 2020 enfreta hela. Maske nune’e, bele tau konfiansa nafatin ba VIII Governu no PN atu bele buka dalan LEGÁL ba resolve aprovasaun OJE 2020.

Mak la hetan dalan LEGÁL adekuada ba aprovasaun OJE 2020, diak liu orgaun Soberania kompetente sira, buka dalan KONSTITUSIONÁL ruma atu evita EA (Eleisaun Antesipada) no bele Forma Governu foun (bele mai nafatin hosi AMP), molok tinan 2019 remata, atu bele aplika netik esepsaun ruma hosi art. 30.º, n.º 2 Lei OJF hodi hetan aprovasaun ba OJE 2020, ne’ebé bele hahú hosi implementasaun art 111.º KRDTL ba art. 112.º KRDTL to’o art. 106.º KRDTL. Hirak ne’e hotu, depende ba AMP (Aliansa Mudansa ba Progresu), liu-liu partidu CNRT lideradu hosi MBKXG ne’ebé iha nia deputadu maioria iha AMP laran.

Dili, 16 de Outubru de 2019

OBRIGADO WAIN

HAKEREK NO HATÁN

Please enter your comment!
Please enter your name here