Xefe Departamentu Sinál Tránzitu Diresaun Nasionál Transporte Terrestre (DNTT), João Eugênio da Silva. Imajen Tatoli/Egas Cristovão

DILI, 17 dezembru 2019 (TATOLI) – Xefe Departamentu Sinál no Tráfiku Diresaun Nasionál Transporte Terrestre (DNTT) Ministériu Transporte no Komunikasaun, João Eugénio da Silva, hateten bis sira ne’ebé komete infrasaun hodi la para iha terminal, maibé hili para fali iha fatin seluk sei hetan multa $10 to’o 30.

“Ita-nia regulamentu iha ona tuir lei kódigu estrada númeru 5/2003 artigu 11 katak transporte públiku hanesan bis tenke para iha terminál, kuandu transporte públiku la para terminal sei hetan sansaun multa dólar $15 to’o $30”, João Eugénio dehan ba Ajénsia TATOLI iha Kaikoli, ohin.

Hodi hatutan uluk husi DNTT husu ona ba iha motorista bis sira husi munisipiu tenke para iha terminal. “Maibé, agora daudaun husi ami-nia haree bis sira parte Lospalos balun la para iha terminál Becora no sira para fali iha área tasi ibun praia dos coqueiros, nune’e ami sei ko’alia ho Polísia Tránzitu para atu haree ba kestaun ne’e”, dehan nia.

Nia hatutan regra ida ne’e, DNTT aplika ona ba transporte públiku sira kuandu komete infrasaun hanesan ne’e. “Uluk Ami aplika ona sansaun ne’e ba motorista sira no motorista sira balun selu ona”, katak.

Tanba ne’e, DNTT fó aviza ona ba motorista sira atu bis sira mai husi munisipiu, maibé realidade la’ós nune’e.

“DNTT hamutuk ho Polísia Tránzitu sei haree ba ida, tanba ita iha ona regulamentu no ita hotu tenke submete ba regulamentu sira”, João Eugénio afirma.

Kona-ba bis sira husi Viqueque, Baucau, no bis sira parte oeste nian, João Eugénio informa durante ne’e sira kumpre regulamentu husi DNTT.

“Bis sira hanesan parte Viqueque, Baucau, mai para iha terminál, nune’e bis sira parte oeste sira mai para iha Tasitolu”, relata.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here