Lansamentu CANXIGO TV "Online". Imajen: Felicidade Ximenes

DILI, 17 dezembru 2019 (TATOLI)-Sentru Treinamentu CANXIGO, ofisialmente, lansa televizaun (TV) Online. Lansamentu ne´e hala´o direta husi reprezentante Sekretáriu Estadu Komunikasaun Sosiál (SEKOMS), Diretór CEFTEC, Luís Evaristo dos Santos hamutuk ho asesór SEKOMS nian, akompaña husi Diretór CANXIGO, Filipe António Marques.

“Objetivu lansa tv online ne’e oinsá atu fahe informasaun kona-ba naun edukativu nian no  laliu iha edukativu formál nian no liuhusi tv online ne’e ami bele fó informasaun kle’an liu kona-ba saida de’it mak akontese iha ita-nia nasaun ida ne’e,” dehan Diretór CANXIGO, Filipe António Marques via telefone ba Ajénsia TATOLI, ohin.

Kona-ba programa, ezekutivu ne´e hateten katak iha TV Online ne´e sei oferese ba públiku informasaun, purezemplu edukasaun, saúde no programa seluk tan.

 Enkuantu, kona-ba rekursu umanu, Diretór Filipe António Marques informa katak sei la buka husi li´ur maibé sei utiliza rekursu umanu sira ne´ebé sentru ne´e rasik prodús. Ekipamentu sira, sentru rasik mak aranja hodi fasilita funsionamentu TV Online ne´e.

 “Ami iha momentu ne’e kedas seidauk ajuda ruma husi se de’it. Ami mesak mak hala’o servisu ida ne’e hanesan mós diretór CEFTEC ohin hateten mai ami  buka meius oinsá para  bele hetan meius ida husi estadu nian maibé  ami seidauk hanoin too iha ne’ebá,” nia haktuir.

 Iha ámbitu lansamentu, Reprezentante SEKOMS (Sekretáriu Estadu Komunikasaun Sosiál), Diretór Nasionál CEFTEC (Sentru Formasaun Téknika iha Komunikasaun), Luís Evaristo dos Santos hateten, Sentru Formasaun CANXIGO iha ona kondisaun no benefísia duni ho formandu sira ne’ebé mak iha nune’e bele deside no foti dalan ne’ebé mak loos bainhira fó ona tempu ho durasaun ne’ebé mak iha no tuir formasaun.

Entretantu, iha lansamentu TV Online CANXIGO ne´e, atribui mós sertifikadu ba primeiru formandu na´in 127 no komemora mós aniversáriu CANXIGO nian ba dala-ida.

Partisipa iha lansamentu ne´e mak alende husi SEKOMS, autoridade polisiamentu komunitária, akadémiku Universidade Nasionál Timor Lorosa´e (UNTL) inkluzivamente dosente Komunikasaun Sosiál, jornalista sira no mós públiku sira balun.

Notísia relevante:Uza Media Ho Responsabilidade

Jornalista        : Felicidade Ximenes

Editór              : Rafy Belo

HAKEREK NO HATÁN

Please enter your comment!
Please enter your name here