Diretor Jeral Sekretariu Estadu Protesaun Sivil, Superintendenti Asistente Polisia, Ismael da Costa Babo. Imajen/Nelson Sousa.

DILI, 16 dezembru 2019 (TATOLI)-Governu liuhosi Sekretária Estadu Protesaun Sivíl (SEPS) sei distribui apoiu rekuperasaun materiál konstrusaun ba uma-kain 717 ne’ebé sofre dezastre naturaís (anin boot ho inséndiu) iha 2019.

Notísia Relevante : SEPS Hametin Koordenasaun ho Pontu Fokál iha Baze

Vítima hirak mai hosi Munisípiu Aileu, Bobonaro, Ermera ho Liquiça, sei simu material sira hanesan, kalén, besi, pregu, ai-kuadradu ho orsamentu mão de obra iha loron determinadu, 19 dezembru 2019.

Diretór Jerál SEPS, Superintendente Asistente Polísia Ismael da Costa Babo,  informa, dadus verifikasaun hosi munisípiu  hatudu iha Munisípiu Aileu totál uma 61 mak hetan estragu, kompostu hosi kategoria aat totál 10, aat natoon 38, aat kaman 13.

Bobonaro,  uma estragu 115 ho kategoria aat total 20, aat natoon 54, aat kaman 41. Ermera uma estragu 475 ho kategoria aat totál 147, aat natoon 8, aat kaman 320. Iha fali Liquiça uma estragu 46 ho kategoria aat totál 21, aat kaman 25.

“Ami sei distribui apoiu rekuperasaun iha loron rua ka tolu tan ba família vítima sira hodi nune’e bele harii lalais sira nia uma ne’ebé estragu ona,” informa, Ismael da Costa Babo, ohin, hodi responde Ajénsia TATOLI iha nia servisu fatin, Caicoli, Dili.

Ismael da Costa Babo hatete, apoiu rekuperasaun ba vítima 2019 nian hala’o uluk ba munisipiu haat refere tanba tuir kbiit orsamentu ne’ebé iha limitadu no ba tinan oin 2020 sei tau orsamentu atu bele apoiu mós ba munisípiu sira seluk.

SEPS sei fó mós apoiu rekuperasaun ba vítima afetadu dezastre naturaís iha 2018 hamutuk 1.100 hosi Munisipiu Dili, Bobonaro, Ermera ho Lautem ne’ebé antes ne’e seidauk hetan apoiu.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here