Prezidente IPG, Hélio C. Guterres. Imajen/Tatoli Egas Cristovao.

DILI, 16 dezembru 2019 (TATOLI) – Prezidente Institutu Petróleu no Jeolojia (IPG, sigla portugés), Hélio C. Guterres, hateten hafoin kriasaun IPG iha 2012 no hala’o servisu loloos iha 2013, identifika katak Timor-Leste (TL) la’ós de’it riku iha rikusoin, maibé mós riku iha risku.

“Hafoin estabelese IPG ami tuur hamutuk, haree ema barak ko’alia liu kona-ba rikusoin, depois ami la’o iha fulan balu nia laran de’it ami haree katak la’ós riku de’it iha rikusoin maibé riku iha risku, entaun ida ne’e ami fahe ba divizaun tolu para haree”, Prezidente IPG informa iha salaun IPG, Delta, ohin.

Divizaun tolu ne’e maka hanesan geo investigation, geological investigation no risku jeolójiku.

“Iha divizaun geological fahe ba fatin tolu, risku naturál, jeolójiku no idrojeolojia katak kona-ba bee, tanba bee ne’e laiha mós ita mate no bee barak liu mós ita mate”, Hélio afirma.

Hodi dehan servisu IPG nian foku liu ba investigasaun, ne’ebé kualkér saida de’it halai hosi rai-leten bá okos ne’e investigasaun ne’ebé halo estudu kona-ba ba ida ne’e tantu ba rikusoin no mós risku.

Investigasaun ne’ebé IPG halo hahú hosi fronteira, ne’ebé investigasaun iha ona porsentu 30 iha mapa jeolójiku no iha rekursu Mina-rai porsentu 50.

Entretantu IPG estabelese iha 2012 ho dekretu lei númeru 33/2012 ho objetivu prinsipál atu halo investigasaun sientífika no koleta dadus jeolojia, rekursu minerál hanesan gás, petróleu, inkluindu risku jeolójiku no idrojeolojia iha territóriu laran tomak.

Notísia relevante : IPG Lansa Sentru Informasaun no Sistema Monitorizasaun ba Rai-nakdoko

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here