Klube Fitun Estudante Lorosa’e (FIEL) . Imajen/Dok.LFA

DILI, 16 dezembru 2019 (TATOLI) – Diretór Verefikasaun no Lisensa Liga Futeból Amadora (LFA), José Carvalho, hateten klube Fitun Estudante Lorosa’e (FIEL) hanesan klube segunda divizaun maibé konsege hatudu ezemplu di’ak ba klube primeira divizaun sira tanba kumpre regulamentu ne’ebé liga fó sai.

“Ami bele hatete katak, la’ós klube sira mai partisipa iha Liga Juveníl ne’e la halo tuir regra hotu, maibé iha klube segunda divizaun balun hanesan Fitun Estudante Lorosa’e mak hanesan ekipa ida ne’ebé kapas tebes tanba mai ho jogadór ne’ebé idade naton, hatudu jogu kapas no disiplina”, dehan José ba Agência Tatoli iha edifísiu LFA, Bairro Formosa, segunda ne’e.

Nia hatutan, klube FIEL iha duni vontade boot atu promove jogadór hirak ne’ebé antes ne’e sei taka aan hela.

“Sira nia jogadór ne’e ami haree iha ida ka rua mak brillante tebes. Klube hanesan ne’e mak hakarak promove duni futuru jogadór, tanba kumpre regra no promove jogadór hirak ne’ebé antes ne’e taka aan hela”, nia akresenta.

Nune’e, nia husu ba klube hotu hodi bele banati tuir ezemplu ne’ebé klube refere halo, nune’e bele prodús jogadór barak liu tan ba futuru.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here