Komandante PNTL Munisípiu Dili, Superintendente Xefe Armando Monteiro. Imajen/Eugénio Pereira

DILI, 16 dezembru 2019 (TATOLI)-Polisia Nasional Timor-Leste (PNTL) liuhosi operasaun “Aplika Lei, Dili Hakmatek”, detein ona Timor-oan nain haat (4) ne’ebé fa’an fogete ilegál iha Dili laran.

Ema nain haat ne’e, PNTL detein bainhira hala’o hela tranzasaun iha Bidau, Becora, Taibesi, Manleuana ho Comoro. Sira hirak ne’e submete ona ba investigasaun hodi hein atu aprezenta ba Ministériu Públiku (MP).

Komandante PNTL Munisípiu Dili, Superintendente Xefe Armando Monteiro, ohin, iha Komandu PNTL Dili, iha Caicoli, relata, evidénsia sira ne’ebé PNTL rekolla hosi ema nain haat ne’e asegura ona atu lori hotu ba aprezenta iha MP.

Superintendente Xefe Armando Monteiro, afirma sira nia parte, inklui komandante munisípiu 12 ho RAEOA (Rejiaun Administrativu Espesiál Oe-Cusse Ambeno)  simu ona orientasaun hosi  Komandu Jerál PNTL atu halo operasaun hodi garante seguransa masimu ba selebrasaun loron Natál, 25 dezembru 2019 ho tinan foun,  01 janeiru 2020.

Komandu PNTL Dili harii ona postu polisia tránzitu 10 no postu polisia vijilánsia 11 atu halo servisu iha oras 24 nia laran hodi asegura bairru sira ne’ebé risku ba konflitu hanesan Comoro, Raicotu, Becora no fatin seluk tan.

Komandu PNTL mós halo ona koordenasaun ho Dioseze Dili hodi asegura seguransa másimu durante selebrasaun misa kalan Natál to’o tinan foun 2020.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here