Prezidente Repúblika, Francisco Guterres Lú Olo. Imajen Tatoli/António Gonçalves

DILI, 15 dezembru 2019 (TATOLI)–Prezidente Repúblika (PR), Francisco Guterres Lú Olo, liuhusi Dekretu Prezidente Repúblika númeru 63/2019, 12 dezembru, rekoñese Francisco Rodrigues Kalçona “Bere Mata Ruak” ninian kontribuisaun iha luta ba independénsia nasionál. 

Dekretu ne’ebé TATOLI asesu husi pájina ofisiál Mídia Prezidénsia Repúblika, ohin, hateten ho ninia kontribuisaun iha luta libertasaun nasionál, Francisco Rodrigues Kalçona “Bere Mata Ruak” iha direitu atu hetan onra fúnebre no sei hakoi iha Jardim dos Herois da Pátria Metinaro, Dili.

Bere Mata Ruak nu’udar fundadór ida no militante ba movimentu estudantil no juventude Timor-Leste. Iha fulan-outubru tinan-1974, Bere Mata Ruak ho formasaun polítika husi membru Comité Central FRETILIN harii União Nacional dos Estudantes Timorense (UNETIM) hodi defende direitu estudante ba demokratizasaun edukasaun no luta ba ukun rasik an.

UNETIM nu’udar organizasaun dahuluk ne’ebé implementa trabalho de base ho objetivu halo povu nu’udar protagonista prinsipál luta libertasaun nasionál.

Nu’udar membru husi Corpo Diretivo UNETIM, Bere Mata Ruak partisipa iha mobilizasaun estudante husi eskola sira iha Dili atu tuir kampaña alfabetizasaun ho métodu Paolo Freire, edukadór populár husi Brazíl, atividade produsaun, irigasaun, saúde, promosaun kultura populár no konxiensializasaun.

Husi kuadru UNETIM mak FRETILIN harii Organização Popular da Juventude Timor (OPJT) iha loron-10 fulan-juñu tinan-1975 hodi halibur foin-sa’e hotu-hotu atu luta ba libertasaun nasionál.

Lee mós: Prezidénsia Repúblika Presta Omenajen ba ‘Bere Mata Ruak’

Iha situasaun difísil, nu’udar estudante iha eskola Liceu DR Francisco Machado, Bere Mata Ruak hili atu husik ninia estudu hodi fó an tomak ba luta libertasaun nasionál.

Iha tempu ne’ebá, estudante sira mai ho palavra órden “mais vale perder um ano e ganhar a Pátria do que ganhar um ano e perder a Pátria (di’ak liu lakon tinan ida hodi manán Pátria, duké manán tinan ida hodi lakon Pátria).

Iha fulan-Outubru tinan-1975, ho ninian envolvimentu iha OPJT, FRETILIN nomea Bere Mata Ruak sai membru Comité Central FRETILIN ho responsabilidade nu’udar Vise-Sekretáriu OPJT.

Iha períodu FRETILIN hala’o funsaun nu’udar Governo de Facto, hafoin administrasaun Portugés husik Timor, OPJT iha papél prinsipál ba mobilizasaun povu iha Timor-Leste tomak iha edukasaun, kultura, ekonomia, seguransa no saúde hodi serbí interese povu ninian.

Bere Mata Ruak lori kilat defende fronteira to’o Proklamasaun Independénsia. Iha inísiu invazaun, militár Indonézia kaptura, kastigu no tortura no tama-sai prizaun husi tinan-1975 to’o 1999.

Maski militár Indonézia kaptura, kastigu no tortura beibeik, maibé Bere Mata Ruak kontinua fó apoiu ba luta armada husi vila to’o Timor-Leste hetan nia ukun rasik an.

Journalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here